Tur partido politico y candidato tin obligacion di entrega lista di donacion

Comision di Finansas ta recorda

*Incumplimento por resulta den multa 

ORANJESTAD (AAN): Tur partido y candidato politico mester ta na altura cu for di 1 januari 2021 a drenta na vigor na Aruba e ley pa Regulacion di Finansas di Partido Politico (AB2020 no. 153). E ley aki ta enfoca riba controla y regula e uso di e finansas di partidonan político y candidatonan cu ta participa den eleccionnan parlamentario.
            E Comision di Finansas di Partido Politico, cu e presidente di Conseho Electoral ta na mando, tin e tarea pa  percura a cu tur partido y candidato ta cumpli cu e regla financiero.   Recientemente a instala oficialmente e Comision di Finansas, y pa prome biaha lo por haci un monitoreo structural di e finansas di tur partido y candidato durante e eleccion di 6 di december 2024.         

            E Comision di Finansas a recorda tur partido politico y candidato di nan obligacion pa sigui e reglanan stipula pa e eleccionnan venidero, segun ta establece den e ley. Transparencia den finansas lo ta crucial pa un eleccion husto y limpi.

Rekisitonan Principal

1. Registro di Donacion:
   Tur partido y candidato mester registra e donacionnan cu a ricibi for di 12 luna prome cu eleccion.
2. Entrega di Registro:
   E registro di donacionnan te 21 dia prome di eleccion mester wordo entrega na e Comision di Finansa. Entrega di esaki mester tuma luga entre 21 pa 14 dia prome cu e eleccion venidero.
3. Declaracion di Entrada y Gasto:
   Tambe nan mester presenta un resumen di e entrada y gasto di nan actividadnan di recaudacion di fondo.

Si nan no cumpli cu e rekisitonan aki, e Comision di Finansas por solicita informacion adicional y tambe por impone multa.

Publicacion di Donacion:

• 7 dia prome cu eleccion, e Comision di Finansas lo publica un resumen di e donacionnan ricibi door di e partidonan politico y candidatonan.
• Despues di eleccion, e partidonan politico y candidatonan mester entrega otro resumen dentro di 7 dia despues di eleccion y e Comision di Finansas lo publica un rapport 14 dia despues di e eleccion.

            Ta fundamental cu tur e partidonan politico y candidatonan cu ta participa den e eleccion dia 6 di december 2024 ta na altura di nan obligacionnan y cu nan lo cumpli cu e obligacionnan aki pa garantisa e transparencia financiero.