Tur compania di Watersports a haya sa di cambionan cu ta bin cu vergunning y rekisitonan nobo

Minister Ursell Arends:

• Pa garantiza seguridad den nan operacion 

ORANJESTAD (AAN) Minister Ursell Arends, titular di Transporte, den un entrevista cu DIARIO a elabora tocante e desaroyonan riba tereno di Water Sports.

   E mandatario a bisa cu el a sostene un combersacion cu e companianan aki y tabata tin sesion, pa anuncia e cambionan cu ta bin pa loke ta trata e vergunning y rekisitonan nobo.

   Arends a bisa cu e reunion a bay den bon ambiente y aworaki nan ta bay forma un comision  p’asina aki nan bin cu algun punto cu nan kier worde atendi cu ne, prome cu 1 Januari 2025.

   “Anto, e palabracion ta cu 1 di Januari 2025 lo mester introduci un ‘propeller guard’ (sorto di protector pa chapaleta) y aworaki nan ta esnan cu ta bay haci analisis hunto cu otro departamentonan tecnico di gobierno, p’asina aki wak e miho forma di introduci esaki.

   “Pero mi mester bisa cu e companianan ta colabora, nan ta dispuesto tambe pa adapta y haci e cambionan aki, y mi ta kere cu den dialogo ta caminda cu futuro partidonan ta sali gana, y mester bisa cu internacionalmente tambe, despues di e accidente cu a tuma lugar cu e turista, aworaki bo ta wak cu e cambionan cu nos a introduci, e famianan y prensa internacional tambe ta reconoce cu nos ta bayendo den e bon direccion pa garantiza seguridad, pa loke ta trata operacion di tur e water sportnan, y e bida di e personanan cu ta haci uso di e actividadnan aki”, Minister Ursell Arends a señala.