“Training Infant Mental Health” ta un modelo cu a cuminza na 2017 te 2019

Maryla Solognier nurse specializa di WGK:

*Actualmente tin varios instancia social cu ta siguiendo e opleiding 

ORANJESTAD (AAN) –Maryla Solognier, nurse specializa trahando na Wit Gele Kruis, den entrevista cu DIARIO a elabora tocante e “Training Infant Mental Health” cu WGK ta bezig ta dunando.

Maryla Solognier a menciona cu, eigenlijk, nan a bin cu e metodo aki y cuminza cu opleiding na aña 2017 y a cabe na 2019. “Y semper nos tin e intencion di sigui cu esaki, por ehemplo, den forma di un consulta pa mayornan cu tin yiu cu nan no sa kico haci cu nan. Por ta, e comportacion no ta bay bon y nan kier mas guia den esey. Tambe nos tin coleganan cu ta traha den consulta di baby, di cero pa 15 luna, pa nan tambe haya informacion pa wak con nan por guia e mayornan cu yiu hopi chikito”, Solognier a menciona.

            El a splica cu mayornan cu tin dos of tres trabao ta haya stress cu cada dia ta acumula mas, nan ta bay cas, e yiu ta na cas, partner a na cas, y nan no sa con pa deal cu e stress aki y nan por reacciona riba nan yiunan, locual no ta e intencion.

            Tambe e ta pa incorpora e guia cu nan ta haya pa sa con pa yuda nan yiunan, pa bay on cu esey, kico nan por haci, y cual instancia nan por acerca, por ehemplo.

            Tambe nan ta bay cas cerca e mayornan, ta duna guia y conseho y tambe ta referi nan na diferente instancia, pasobra tin mas instancia acerca, cu ta bezig cu e training, por ehemplo DAS, hendenan di KPA, Departamento di Salud Hubenil di DVG, y diferente instancia cu tambe ta traha cu mayor y yiu, cu mucha di 0-12 aña, cu tambe por haya hopi beneficio di e metodo aki.

            “Ta sosode hopi cu ora nos ta bay cas di famia, e mayornan, por ta nan a perde nan trabao, of e placa no ta yega pasobra costo di bida ta hopi halto, nan no sa ki pa haci y, esey, naturalmente ta keda acumula y na cas nan ta reaccion por ta riba e pareha, riba nan yiunan, y esey por cuminza e consecuencianan fastioso cu por tin”, Maryla Solognier a relata.

            Ora e mayornan ta wordo referi na otro instancia, esaki por duna siguimento na e situacion te ora e yiu ta mas grandi y sigui duna e guia si ta necesario.