Tracy van der Biezen ta e prome graduado di SISSTEM Faculty na Aruba

ORANJESTAD (AAN): Prome Minister Evelyn Wever-Croes dialuna ultimo tabata presente na e graduacion di Tracy van der Biezen na Universidad di Aruba.

Tracy ta e prome graduado di SISSTEM Faculty na Aruba. Tracey a cab’e den 35 luna, cu ta dentro di e tempo nominal di 36 luna. Dialuna, Tracy a defende su thesis na un forma sublime.

            Gabinete Wever-Croes na maart 2019 a firma e acuerdo di SISSTEM, cu desde september 2019 ta un facultad na Universidad di Aruba dirigi riba e materianan tecnico STEM (Science, Technology, Engineering y Mathematics) y sostenibilidad.

            Cu e facultad aki tambe, nos ta kere firmemente cu e gab di genero cu ta existi den e industrianan STEM, lo wordo reduci na nos pais como tambe den region.

            Programanan manera SISSTEM ta necesario pa encurasha hende muhe especialmente, pa pusha limitenan invisibel y kibra e mentalidad stereotipo cu mayoria biaha ta domina den e industrianan aki. P’esey ta importante pa encurasha diversidad y inclusion den e tereno di STEM pa di berdad obtene solucionnan sostenibel pa un miho desaroyo.

            Prome Minister ta felicita Tracy van der Biezen cu su graduacion como e prome graduado y e prome graduado femenino den e facultad di SISSTEM y ta desee hopi exito cu su masters.