Cifranan mustrando crecimento di 18 porciento
*Casi 85% di bishitantenan ta procedente di Norte America
ORANJESTAD (AAN): Tur kwartaal Banco Central ta observa e Tourism Receipts (Tourism Credits), cu ta mustra e cantidad di placa cu turismo ta trece pa nos economia. A.T.A. a pone como meta pa yega recuperacion di 95% pa e indicador aki den 2022. Recientemente Banco Central a publica e cifranan di e ultimo kwartaal di 2022. Esaki ta ilustra un recuperacion di 118% den Tourism Receipts na 2022 compara cu 2019.
Mester enfatisa e importancia di e indicador aki pa loke ta trata recuperacion di nos turismo, mirando cu e ta un di e indicadornan cu ta ilustra no e cantidad di bishitante cu a bin Aruba, pero e cantidad di placa cu a worde genera a traves di nan bishita. Tourism Receipts ta e entrada directo genera pa medio di turismo y ta exclui e entrada indirecto cu Aruba su economia ta genera danki na e industria turistico.
Maart 2023 compara cu 2019 y 2022: Den luna di maart 2023 nos destinacion a ricibi un total di 109,295 bishitante “stay-over”. Si compara luna di maart 2023 cu maart 2019 - cu tabata e ultimo aña normal di turismo, por mira cu Aruba a recupera 102% di locual a worde ricibi na maart 2019, cu ta indica un crecemento di 2%.
Si compara maart 2023 cu maart 2022 por wak un recuperacion di 114% cu ta indica un crecemento di 14%.
Mercadonan y categorianan di acomodacion: Den maart 2023 84.8% di e total di e bishitantenan “stayover” pa Aruba a bishita for di Norte America, 5.7% a bishita for di Europa, 7.2% a bishita for di Latino America y 2.3% tabata procedente di otro partinan di mundo.
Mirando e categorianan di acomodacion, den maart 2023 36.6% di bishitante a keda den hotelnan Highrise, 8.9% a keda den hotelnan Lowrise, 25.2% a keda den Timeshare y 29.3% a keda den otro tipo di acomodacion, conoci tambe como vacation rentals.
Vacation rentals: Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta worde uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera.
Si compara maart 2023 cu maart 2022 por wak cu e prijs averahe di e acomodacionnan aki a crece cu 12%, for di un prijs averahe di $237 pa anochi na maart 2022 pa un prijs averahe di $266 na maart 2023. Si compara maart 2023 cu maart 2019, por wak cu e prijs promedio di e acomodacionnan aki a crece cu 45%, for di un prijs promedio di $184 pa anochi na maart 2019 pa un prijs averahe di $266 na maart 2023.
Si compara maart 2023 cu maart 2022 por wak cu e ocupacion averahe di e acomodacionnan aki a disminui cu 1 punto di porcentahe, for di un averahe di 63.7% na maart 2022 pa un averahe di 62.7% na maart 2023. Si compara maart 2023 cu maart 2019 por wak cu e ocupacion averahe di e acomodacionnan aki a crece cu 19.1 punto di porcentahe, for di un promedio di 43.6% na maart 2019 pa un promedio di 62.7% na maart 2023.
Den caso di entrada, si compara maart 2023 cu maart 2022 por wak cu e categoria a genera un crecemento den entrada di 24%. Si compara maart 2023 cu maart 2019 por wak cu e categoria a genera un crecemento den entrada di 156%.
