Coordinador Lenny Geervliet a splica:
ORANJESTAD (AAN) – Den entrevista cu DIARIO, señora Lenny Geervliet, Coordinador di e Proyecto 125, a relata den corto con e iniciativa aki a bin pa un linea di telefon pa nos grandinan, y tambe a elabora di e necesidad di boluntario cu 125 tin.
El a reitera cu e prome iniciativa a bin durante e temporada di Covid-19 pasobra e adultonan mayor no por a yega na Club Kibrahacha y mester a keda cas y e ora ey e Club a dicidi cu na lugar cu nan bin Kibrahacha nan mes a bay nan cas, pero door di Covid esaki tampoco tabata posible.
E ora ey a bin cu e pensamento di un linea telefonico. E tempo ey nan a haye gratuitamente for di Bureau Rampenbestrijding pasobra e tabata un “crisis line”, y el a haya asina bon acogida cu Club Kibrahacha a pensa cu e por continua. Pero pasobra mester a recauda fondo y instal’e a tarda asina hopi.
Den e temporada ey a entrena dos grupo di boluntario, pero door cu el a tarda pa lanta y cuminza cu e trabao, nan a haya otro cos pa haci, algun a bay biba afo, entre otro, y awo proyecto 125 ta den necesidad di boluntario.
Esaki kiermen, boluntario cu ta sinta den e lugar, ta contesta e yamadanan, ta registra esakinan, y ta ricibi e training pa sa con pa atende cu un yamada asina. Un hende cu yama e persona di otro banda di e linea no ta wak’e pero solamente ta scucha, y pesey nan tin e training prepara.
E ta un training di cinco encuentro pero e por bira mas si tin necesidad. Mañan, Diasabra 14, lo duna splicacion mas amplio unda por haya informacion mas amplio tocante kico e trabao ta encera, cuanto tempo e boluntario por dedica na dje, kico e training ta encera, e background di e pensamento di e yamadanan y telefon pa adulto mayor. E servicio ta gratis, a haya colaboracion di un supermercado grandi y Minister Arends a pone suficiente fondo riba presupuesto pa por a realiza e proyecto.
