Tormenta Tropical Ana kizas awe ya ta bay disipa

ORANJESTAD (AAN): For di siman pasa caba, Meteorologonan tabata sospecha cu e prome sistema tropical cu un nomber lo nace. 

Sinembargo el a wanta un poco, y ata den fin di siman si, Tormenta Tropical Ana a nace.

   Diadomingo mainta 11:00 am, Tormenta Tropical Ana su centro tabata cerca di 36.6º Nort y 59.4º West.  Esaki ta como 595 km Noordoost di Bermuda, y moviendo Noordoost cu velocidad di 22 km/h.

   Biento maximo sosteni ta di 64 km/h, cu algun rafaga cu ta yega te na 83 km/h.  Segun satelite, conveccion di e tormenta a disminui riba henter e zona di tormenta, y no por a mira ningun tormenta electrico activo y significante mas banda zuid.

   Olanan di te cu 12 pia tabata wordo observa como 144 kilometer zuidoost di e tormenta, y 96 km zuidwest y noordoost, y dentro di 48 kilometer den area noordwest.

   E pronostico ta cu Ana lo disipa awe Dialuna ora cu e ta sigui move direccion noordoost, aunke bientonan fuerte lo persisti mucho mas largo.

   Meteo-France ta sigui pronostica biento fuerte riba costa cerca di Morocco pa e area di Tarfaya riba Dialuna.  Biento fuerte lo sigui den region Agadir riba Diamars tambe.

   Meteo-France ta pronosticando biento fuerte tambe pa e area di Canarias riba Dialuna.  Lama lo ta bruto den e areanan menciona.  E biento ta bin debi na un diferencia grandi di presion, unda tin presion halto riba islanan di Azores, y presion abao riba noordwest di Africa.

  NOMBERNAN:

   Temporada di Horcan ta cuminza oficialmente 1 di Juni, y meteorologonan y expertonan di Hurricane Center na Miami, a pronostica cu lo bay ta un temporada cu ta bay conoce mas tormenta compara cu e promedio di semper.  Kizas lo por haya 20 tormenta cu nomber cu lo forma.  Di e 20 aki, por lo menos 10 ta wordo pronostica di bira Horcan.

   E nombernan pa Tormenta den 2021 ta:  Ana, Bill, Claudette, Danny, Elsa, Fred, Grace, Henri, Ida, Julian, Kate, Larry, Mindy, Nicholas, Odette, Peter, Rose, Sam, Teresa, Victor, y Wanda.

   Tormenta Tropical Ana no tin ningun peligro pa Aruba, ni Caribe.