Tin hende cu a venena un Warawara y awor e ta luchando pa su bida

Disgusto den pueblo

ORANJESTAD (AAN): For di Aruba Birdlife Conservation, a tuma nota di un caso hopi lamentabel cu e siman aki a keda registra riba e isla.  E ta no djis algo tristo, pero e ta bira alavez un alerta pa tanto legisladornan y comunidad tuma bon nota di dje.

   Esaki ta e parha iconico ‘Warawara’ di Aruba, cu awor ta luchando pa su bida despues cu un of mas hende a pone veneno pe.  Aki por mira Greg Peterson di Aruba Birdlife Conservation cu e Warawara, y cu ta den man awor di veterinario Dr. Ricardo Gogorza cu ta tratando tur medio pa asina salba su bida.

   Esaki no ta djis pasando cu Warawara aki, sino tambe cu recien a bin haya un Shoco di Aruba cu a wordo venena.  Esaki ta algo inaceptabel, y mester stop inmediatamente.

   Uzo incontrola di veneno ta matando animalnan di mondi.  Corda cu veneno no ta keda unda cu bo a pone nan.  Nan ta plama door di e sistema natural, afectando parha, animal y finalmente humanidad tambe.

   Un suplica urgente ta bay na gobernantenan pa purba na trece reglamentonan mas estricto pa cu uzo di veneno cu por wordo permiti.  Tambe pa defini y stipula benta maximo di veneno.  Tambe implementa guia estricto y monitoreo di tur esaki.