Top of Form
Ni structura salarial ni CAO…
ORANJESTAD (AAN) Te ainda e trahadornan di Arubus no por mira e luz na final di e tunel, pasobra e sindicato cu representa nan no a logra keda cla cu e structura salarial, kiermen no tin un CAO satisfactorio na caminda.
Tin fuerte indicacion cu, alomenos, varios trahado ta hopi disgusta y nan no ta kere e sindicato mas, pasobra con cu bay bin no tin solucion pa nan problema. Aparentemente, e intencion tabata pa bay den paro diamars di e siman aki, pero e trahadornan a nenga pasobra si nan bay mas cu dos ora, nan ta wordo desconta di salario y ta ken ta para responsabel pa nan? E sindicato? Sigur no!
Por corda cu aña pasa SEPPA a divulga un informacion cu tabata parce positivo, ora cu e Minister na mando na e momento ey a bay di acuerdo cu e proposicion cu tabata tin riba mesa, cu mester a bay Parlamento pa duna e trahadornan un compensacion debi cu a extende e CAO pa e aña aki, 2025. No obstante e trahadornan ta sigui warda mientras gobierno ta bisa cu no tin placa pa cumpli cu esaki.
Mientras tanto tin mas cu un problema na Arubus. Ta secreto publico cu den e compania tin un situacion tenso entre e Departamento di Operacion y Garashi. No tin dialogo entre nan, no obstante cu tin algun bus den mal condicion cu ta keda para den e Garashi y no por soluciona esaki sin cu e departamento operacional “baha cabes”.
Segun nos fuente di informacion e situacion den Arubus ta caotico. E ta remarca cu, pa colmo, tin problema interno den SEPPA mes, entre un ex-lider y e secretario general, cu tambe ta genera hopi duda meymey di e delegadonan di Arubus.
