ORANJESTAD (AAN): E opinion publico riba e funcionamento di Servicio di Ambulans a cambia drasticamente awor, compara cu 15 aña pasa.
Esey ta loke e actual hefe di Servicio di Ambulance di ImSan, esta Liberato Hoek a indica den un entrevista.
Aworaki e personal di Servicio di Ambulans ta haya mucho mas elogio compara cu antes. Esey ta bin debi cu antes, publico no tabata mira e balor di Ambulans y su trahadornan. E pensamento antes ta cu ora Ambulans yega, tin di hinca e victima of pashent den e vehiculo, y core lo mas rapido posible rumbo pa Hospital.
Awendia esaki ta full diferente, esta cu e paramediconan na e lugar di accident of sucedido, ta trata na stabiliza e victima prome cu nan haya ta OK pa bay cune den Ambulans y sali rumbo pa Hospital.
Liberato Hoek a indica cu personal di Ambulans ta haya hopi elogio, y no ta costumber di nan pa ‘publica’ esaki. Pero nan ta wordo comparti internamente. Hoek a admiti cu nan sa haya elogio di turistanan tambe cu ta di bishita na Aruba.
Como cu keto bay pandemia tin efecto riba e isla, e decision a cay cu lo no bay festeha Siman di Ambulans manera antes. Hoek a indica cu nan a djis bay haci algo chikito, incluyendo un Misa na Kapel di Alto Vista.
Durante siman lo bay tin algun actividad chikito pa e personal, y a palabra caba cu pa 2022 lo bay celebra esaki mas grandi.
E speranza tey cu publico lo sigui coopera cu Ambulans. Pues ora cu personal yega na cas pa atende un emergencia, por fabor duna nan espacio pa nan por labora profesionalmente, y no ta na su lugar pa e ora ey bay critica of busca guera cu e personal, pasobra nan a yega pa yuda tur hende.
Chauffeurnan cu ta mira Ambulans ta bin cu sirena y luz cendi, corda cu nan ta haciendo esey debi cu tin un urgencia. Pensa cu e persona den e vehiculo di Ambulans ey lo por ta un famia di bo mes cu tin di yega rapido na Hospital.
