ORANJESTAD (AAN) – Den conferencia di prensa di gobierno, Dialuna di e siman aki, Minister Presidente Evelyn Wever-Croes, a haci un comparacion locual ta pasando na Curacao y Sint Maarten,
cu a haci algun hende na Aruba tambe un poco nervioso. Esaki den e marco di e ayudo di Gobierno Hulandes.
E dignatario a asegura cu no tin motibo pa ta nervioso. “Aki na Aruba, nos tin otro approach, pa loke ta trata Hulanda, Landspakket y COHO”, el a acentua.
E mandatario a bisa cu ta gobierno di Aruba a bati na porta di Hulanda pa presta placa, cu gobierno a haye na 0% y nan ta sigui na mesa pa papia di e condicionnan.
“No ta tur condicion nos ta di acuerdo cune. Tin algun condicion nos ta haya draconico, pero no kiermen bo ta lanta for di mesa bay. Bo ta sigui na mesa y bo ta purba yega na otro, pasobra na fin di dia ta pueblo di Aruba ta esun cu ta den necesidad”, Minister Presidente a subraya.
Gobierno a tuma nota di un carta cu Secretario di Estado Knops a manda pa Curacao, pa e lidernan nobo cu mester bay forma, den cual e ta cuminza pone presion.
“Hulanda ta cuminza pone presion riba Curacao cu si no sinta na mesa pa papia di COHO, e ora ey no tin sosten di likidez. Eynan nos no kier yega y nos no lo yega tampoco, pasobra nos si ta na mesa y nos ta sigui negocia”, Premier Wever-Croes a señala.
Ademas, gobierno a tuma nota di otro carta cu Secretario di Estado Knops a manda pa gobierno di Sint Maarten, den cual tambe ta pone presion y tambe ta amenaza cu no ta duna sosten di likidez.
“Mi ta kere cu enberdad tur hende na Aruba a mira e cartanan aki den fin di siman, pero esaki no ta e caso pa Aruba” e dignatario a reitera.
Minister Presidente a remarca cu ta hopi importante pa aki na Aruba nos realiza cu ta nos, tin mester di e cen aki.
“Mi no ta bisa cu nos mester baha cabes y acepta tur cos, ma bo no por lanta for di mesa bay tampoco. Nos como adulto tin cu keda papia di e temanan y wak unda bo ta yega na otro, y esey ta locual nos a scoge pe”, Minister Presidente a subraya.
Prome Minister a agrega cu aki na Aruba ta hopi importante, principalmente awo den e campaña electoral, pa no bay laga ningun hende gaña bisa cu nan ta bay kita tur cos for di mesa, cu nan ta bay pone COHO un banda, y cu nan ta kibra tur palabracion.
“Esey no por pasa! Si esey pasa e no ta na beneficio di Aruba. Ta hopi a tarda nos pa nos yega asina leu pa firma e acuerdo. Esaki ta un acuerdo balansa y na momento aki, e ta necesario ainda” Prome Minister a enfatiza.
