Ta importante pa sostene proyectonan positivo pa hobennan por expresa nan talentonan

ORANJESTAD (AAN): Diasabra ultimo Minister Endy Croes hunto cu Parlamentario Shailiny Tromp-Lee tabata presente na Club Caiquetio na Paradera

pa e anochi final di e prome edicion di ‘Step it Up’. Un anochi yena cu color, alegria, creatividad, diversidad di coreografia.

Un total di cuater scol a participa den e anochi final; Mon Plaisir College, Scol Practico pa Ofishi (SPO) Sta. Cruz, Abraham de Veer School y Maria College MAVO. E scolnan a ricibi tayer di tres diferente baile y esaki a wordo presenta durante e anochi final.

   Step it Up” ta un proyecto cu a participa den e programa “Pitch Time” di CEDE Aruba y ta di hoben pa hoben den cual lo yuda e hobennan pa expresa nan mes atrabes di e arte di baile y tambe yuda hobennan desaroya nan talento. E mision di e proyecto ‘Step it up’ ta pa duna e materia di CKV como tambe arte en general balor na scolnan secundario.

   ‘Nos ta sostene tipo di proyectonan positivo asina caminda hobennan ta haya a traves di coreografia e oportunidad pa desaroya y expresa nan talentonan’, e Mandatario a enfatisa. Minister Endy Croes ta felicita e lider di e proyecto, Rafael Garcia, e comision organisado, boluntarionan y patrocinado cu a haci e proyecto aki posibel y exitoso. Alabes ta gradici docentenan, mayornan y e scolnan cu ta permiti e alumnonan participa den programanan asina bunita y educativo. Minster Endy Croes ta felicita e scol ganador Mon Plaisir College.