ORANJESTAD (AAN): Parlamentario Darlaine Guedez-Erasmus di fraccion di MEP ta indica cu Parlamento, gobierno y comunidad completo ta mira e importancia pa sigui brinda atencion y ayudo na nos hendenan y busca solucion pa problematica di animalnan na Aruba.
Diabierna 10 december 2021, durante un comision central, Parlamento di Aruba a duna su sentimento pa trata e prolongacion di e contract di e profesionalnan cu ta traha den cuadro di e proyecto di e Sociaal Crisisplan.
E 53 profesionalnan aki ta hasiendo un bon trabou y ta hopi importante pa asina nan por sigui brinda e sosten cu nos comunidad mester.
Ta bay atende cu e problematica di cachonan riba caya
Un otro punto di agenda cu Parlamento di Aruba a duna su sentimento riba dje, ta e intercambio di un post pa e otro den e presupuesto, mirando e prioridad na e momento aki. A aloca un fondo pa cu e trabaonan di e plan nacional cu ta atendiendo e problematica di cacho riba caya, di cual ta un di e problemanan mas actual den barionan.
Cu e fondo aki e team encarga cu esaki lo por sigui traha riba stimula doñonan pa ta mas responsabel cu nan mascotanan y mehora salud/bienestar di e cachonan cu tin doño y tambe di esunnan cu no tin doño.
Como Parlamentario mi ta haya importante pa por tin un bista amplio riba diferente situacionnan cu ta andando riba nos pais y busca solucionnan a corto plaso pa por brinda un trankilidad meymey di e pueblo.
