MIAMI: E fenomeno di clima ‘El Niño’ ta consisti di dos fase. Esun frieu cu ta ser yama ‘La Niña’, y esun cayente conoci como ‘El Niño’, y nan ta responsable pa variacion di temperatura mas importante na nivel mundial.
E episodio nobo di El Niño cu cientificonan ta pronosticando di ta bay desaroya den siguiente seis lunanan, lo bay trece hopi inundacion y securanan mas severo rond mundo, como tambe piek di calornan intenso, pues e aumento di temperatura global ocasiona pa ser humano, lo wordo enfoca den e fenomeno aki di oceano cu ta bira mas calor.
Tin di corda cu e oscilasion di El Niño y La Niña, no ta regular y tampoco necesariamente un ciclo, manera otro fenomenonan climatico. Berdad por tin varios aña consecutivo cu mesun fase, manera a socede ultimo tres añanan cu La Niña cu a caba di finaliza.
Oficina di National Oceanic and Atmospheric Administration (NOAA) na Merca a declara oficialmente cu La Niña a stop cu su fase frieu na luna di Maart 2023, y awor tin un periodo neutral di e sistema, esta cu ya La Niña no tey mas, pero El Niño tampoco no a yega ainda. Toch tin 62% chens cu El Niño lo yega entre Mei y Juli 2023.
Specialistanan ta convenci cu El Niño lo yega pronto, debi cu e superficie di lama na comienzo di April a registra un promedio temperatura di 21,1º Celsius, superando e record anterior di 21,0º cu a ser registra na 2016.
Fenomeno catastrofico: El Niño ta hisa temperatura di superficie di lama, y cu den region tropical di Oceano Pacifico central esaki por subi cu 0,8 grado Celsius, cu ta un calentamento cu ta altera e variacion di awacero rond mundo. Esaki ta hisa e riesgo di fenomenonan extremo manera secura y inundacion.
E consecuencianan di El Niño lo afecta principalmente henter e region Zuidoost Asiatico y Australia, pero tambe parti di Latinoamerica y continente Africano, y na forma menos intenso, e resto di mundo tambe.
Por ehemplo, El Niño por promove mas formamento di horcan den Atlantico, ya cu e ta modula e direccion di biento den parti mas halto di atmosfera.
Cambio climatico tin un impacto riba El Niño y vice-versa, ta pone cu tanto e nivel di temperatura y di yobida, e extremonan cu lo bay mira durante El Niño of La Niña lo bay ta mas fuerte di loke a ser mira te cu awor.
Nan dos hunto, den e ultimo ocho añanan tabata esnan mas calor den historia di humanidad, y ta un tiki sorprendente, pasobra cu hopi di nan a co-incidi cu La Niña, cu ta haci superficie di lama den Oceano Pacifico mas frieu. Pues normalmente ora di La Niña mester ta mas frieu, pero awor a experiencia un extremo di temperatura durante esaki. Esey ta indicando cu e tendencia di calentamento global ta mas fuerte.
