Mr. Vito Carlo
ORANJESTAD (AAN): Otmar Oduber via su abogado Vito Carlo algun tempo atras caba a pidi Ministerio Publico pa declare liber di tur acusacion, of pone un fecha pronto pa trata y keda cla cu e caso.
E ex minister y ex parlamentario ta para ariba cu e no a actua contra ley y ta convenci cu e lo sali liber di tur acusacion, pero e tardanza di OM den presenta e caso pa wordo trata ta sigui afecta Oduber den su bida priva pa loke ta negoshi y famia entre otro.
Durante un entrevista cu DIARIO a haci cu mr. Carlo, e abogado a splica cu Ministerio Publico tabata construyendo un caso a base di informacionnan eroneo.
“Na mas di un occasion nos a mustra cu e conclusion cu Landsrecherche ta bin cune no ta cuadra y nos a demostra esaki cada biaha”.
Mi cliente a bisa tambe cu si bo wak con, esunnan cu ta sigui trek e investigacion ta e miembronan di Recherche Samenwerkingsteam (RST) cu ta Hulandes.
Bo ta wak na e manera con nan ta haci nan preguntanan y ta saca nan conclusionnan, cu nan no ta compronde completamente nos sistema legal y nos maneranan na Aruba.
No pasobra algo ta mustra castigable pa ley na Hulanda, esaki automaticamente ta e caso aki na Aruba, segun Carlo.
DIARIO a menciona e caso di Benny Sevinger como comparacion cu e caso Flamingo, mirando e manera con awor un donacion politico por wordo mira y trata.
“E ta bira asina aworaki cu si un politico tuma un donacion di un comerciante y pa casualidad e comerciante aki pidi pa haya un erfpacht na dado momento, e no por haye aunque el a cumpli cu tur rekisito”.
Esaki pasobra e Hulandesnan lo mira esaki como un fabor politico, segun Carlo.
DIARIO a puntra e abogado te con leu e por bay pa pidi daño y perhuicio for di Ministerio Publico si su cliente un dia wordo declara liber di tur acusacion, mirando cu sigur Oduber a wordo afecta financieramente, emocionalmente y fisicamente pa su detencion di 23 dia y tur e acusacionnan contra dje, den e caso cu tin añanan largo andando.
Carlo a splica cu sigur por cuminza un caso di daño y perhuicio ora cu e caso ta completamente cla, incluyendo posibel casonan di apelacion.
El a indica cu e chens ta grandi cu esey ta un di e motibonan principal dicon OM no kier duna Oduber un asina yama ‘kennisgeving niet verdere vervolging’, esta cu e no lo wordo persigui penalmente mas.
“OM aparentemente no kier perde cara y no kier ta responsabel pa paga daño y perhuicio, pero si ta asina nan ta pensa esey no ta bon”.
Si bo tin duda den persecusion penal di un persona, djis no hacie e ora ey, segun Carlo.
E proceso di kennisgeving verdure vervolging ta andando caba, pasobra Oduber kier e declaracion cu e no ta bay wordo persigui pasobra el a demostra cu e no a comete hechonan castigable.
“Pa evita gastonan, energia y tempo di ambos banda, lo ta bon pa OM duna mi cliente e declaracion ey y esey nos ta pushando”, segun e abogado.
El a indica cu si OM keda tarda e caso mas hopi, un caso di daño y perhuicio lo costa OM mucha mas placa.
Carlo a splica cu asina tanto biaha durante interogacionnan, nan tabata purba di pone trampa pa Oduber cay aden.
“Pa nan bay asina leu pa troce berdad pa purba condena un persona, esey ta bay hopi leu”, segun Carlo kende a duna un ehempel di un persona cu na 2019 via WhatsApp a pidi Oduber pa ayudo pa loke ta un tereno.
Landsrecherche a confronta Oduber cu e mensahe y a mustre con riba Facebook e persona a post con cu el a haya su tereno.
Ora e abogado a haya e post pa wak si cerca, e post tabata di 2022, pues obviamente no tabata posibel cu Oduber di berdad a duna e persona tereno si e no tabata minister mas.
Tambe e abogado a menciona cu fiscal a presenta informacion cu nan a haya for di Bureau Criminele Inlichtingen (BCI), tocante di supuesto negoshi di tereno cu Oduber lo tabata tin cu Venezolanonan, pa loke ta e tereno banda di e hotel na Aeropuerto.
Fiscal a indica cu Oduber a duna e Venezolanonan, siendo cu a sali na cla cu e tereno ta ‘eigendom’ y no erfpacht.
Tambe OM a bisa cu un persona menciona den e caso di Oduber ta famia di e Venezolanonan, mirando cu e tin mesun fam.
Esaki tampoco tabata berdad, pasobra un di e personanan ta un habitante di Aruba cu famia Colombiano, mientras cu e otro persona ta Venezolano.
“RST a bisa cu informacion confiable ta bisa cu e dos personanan ta famia, siendo cu nos a haya confirmacion cu esaki no ta berdad”, segun Carlo, kende a indica cu OM constantemente ta piscando.
