Hoben di Aruba hayando reconocemento nacional na tera frieu
ORANJESTAD (AAN): Jeralma Tromp, un studiante Arubiano a obtene reconocemento nacional na Hulanda, special pa su dedicacion y exito den e area di educacion, inclusividad y diversidad.
Jeralma ta bishitando Hogeschool Inholland Rotterdam studiando Trabao Social y Servicio Huridico Social, y el a bira awor un finalista pa e premio ‘Echo Award’. E ta un premio nacional cu ta wordo duna na studiantenan excelente kendenan ta compromete pa inclusion, diversidad y cambio social.
Esnan cu topa cu Jeralma, lo nota mesora su atencion sincero y pasion pa e bienestar di tur hende. Na su scol Inholland e ta traha den e Studentsuccess Centrum (SSC), unda e ta apoya studiantenan (Caribense) kendenan ta keda stagna, of ta buscando nan caminda, of cu djis mester di un hende cu kier scucha nan di berdad. Pero su compromiso ta bay mucho mas cu su scol: For di comunidadnan local na Rotterdam te cu proyectonan sostenibel na islanan den Caribe.
Nominacion inespera: “E contratiemponan den bida a comberti den mi forza,” ta loke Jeralma a bisa cu un sonrisa. Cu e palabranan ey el a cuminza su storia, unda e ta papia di su recien nominacion. Su cara ta briya y ta keda sigui modesto. E nominacion tabata inespera, pero e ta mire como un reconocemento caluroso pa su añanan dedicando pa otronan. Loke e kier transmiti ta simpel y contundente. “Haci bo trabao cu curason, no pasobra bo kier haya algo a cambio. Tin biaha ta parce cu bo no ta haciendo un diferencia, pero despues bo ta descubri cu, en realidad bo a planta un simia. E conexion, e perseverancia, y e sinceridad ta e puntonan di unda cambionan di berdad a cuminza.”
E mision di Jeralma ta hopi cla: E kier empodera e otronan pa asina, nan mes e ora por empodera nan comunidadnan, for di Rotterdam te cu e islanan den Caribe. “Si e studiantenan ta sinti nan mes balora aki, nan lo hiba e sensacion ey cu nan bek pa nan mesun sector. Di e forma ey nan lo contribui na futuro di henter comunidadnan.”
Gana confianza y sigui crece: Na Inholland el a haci esey via proyectonan manera ‘We Belong’, cu ta un protecto di NPO cu a yuda studiantenan bolbe sinti nan mes conecta despues di e pandemia, y como president di CAMBES Caribbean United, un comunidad cu ta reforza e visibilidad, e conexion y bienestar di e studiantenan Caribense na henter e hogeschool. “No ta djis trata di studia,” el a splica. “Ta trata di cu e personanan ta sinti nan mes mira, ta gana confianza, y ta tribi di crece.”
Ademas di tur esey, Jeralma ta miembro di e Studentenraad ‘Strategic Education Alliance’ (SEA), unda e ta participa den crea maneho y trece oportunidadnan igual pa studiantenan di Caribe den educacion avanza. “Ta importante cu nos bos ta wordo scucha den decisionnan cu ta afecta directamente nos experiencia academico y futuro,” el a subraya.
Su wela como pilar fundamental: E origen di e compromiso di Jeralma por wordo haya profundamente lora den su raiznan Arubiano. “Mi wela semper tabata un muhe kende a biba pa comunidad,” el a conta cu orguyo. “E tabata yuda e adultonan cu tabata pasa den dificultadnan, tabata scucha nan, ta duna conseho of djis ofrece un tayo di cuminda. Su cas tabata un lugar sigur pa cualkier hende cu tabatin mester di sosten.”
Aunke awor su wela ta sufriendo di dementie, su influencia ta sigui di ta grandi. “E ta sigui aki y ta sigui nifica hopi pa mi,” Jeralma a bisa suavemente. “Loke mi ta haci awendia, den hopi sentido mi ta sigui cu su legado. Wela a siñami loke cuido di berdad ta nifica, respet, y e dignidad humano. Mi tin intencion di transmiti esey den mi trabao, creando un espacio unda e personanan ta sinti nan mes ta wordo scucha, sosteni, y sinti nan mes balora.”
E compromiso social di Jeralma ta bay mucho mas leu cu su scol. E tabata mentor di hobennan emigrante den Stichtin B for You, a yuda hendenan vulnerabel di Rotterdam como coach di presupuesto den WMO Radar Delfshaven, y a traha riba desaroyo sostenibel den Caribe.
Como facilitadora di studiante na Hogeschool Inholland, Jeralma a traha tambe cu e proyecto Food Resilient Futures, cu ta in colaboracion entre Van Hall Larenstein University of Applied Sciences, Aeres University of Applied Sciences, Cultural Park Mangazina di Rei, y otro partnernan. Den e proyecto di laboratorio bibo aki na Caribe Hulandes, el a contribui na e investigacion y e iniciativanan relaciona cu seguridad alimentario sostenibel y resiliencia social. “Pa mi, e sostenibilidad no ta djis tin di haber cu medio ambiente, sino tambe cu husticia: Kende tin aceso na alimento, conocemento of oportunidadnan? Eseynan tambe ta forma di igualdad,” el a splica.
E Echo Award ta reconoce studiantenan cu ta mustra liderato y ta compromete pa un sociedad mas husto. Candidatonan pa Echo Award ta studiantenan cu ta pertenece na gruponan cu no tin hopi representacion, cu ta obtene excelente resultado, cu tin un impacto social visibel, ta contribui na e cambio di maneho y sistemanan y ta demostra liderato. Cada aña ECHO (Expertisecentrum Diversiteitsbeleid) ta invita hogeschoolnan y Universidadnan pa nomina studiantenan cu ta socialmente activo pa nan por ricibi e Echo Award.
Si acaso Jeralma ta gana Echo Award of no, esey no ta lo mas importante p’e. “E recompensa di berdad ta cu hendenan ta sinti nan mes sosteni. Cu un hende ta bisa: “Danki na abo mi ta kere den mi mes bek’. Esey ta e motibo pakico mi ta haci tur esaki. Claro cu gana e premio lo ta algo special, no pa e reconocemento mes, sino pasobra e por habri portanan pa mi por sigui cu mi trabao despues di gradua, y aumenta aun mas mi impacto”.
