Azriah Palm di Fundacion CVA Aruba:
ORANJESTAD (AAN): Señor Azriah Palm di Fundacion CVA Aruba, den un entrevista recien cu DIARIO, a splica cu ‘burnout’ ta un di e factornan principal cu por causa un atake celebral (stroke).
Segun Señor Palm, preocupacion y stress constante por hiba un persona te na punto cu su curpa no por resisti mas. Si e persona no ta maneha e stress na tempo, e por haya un burnout cu eventualmente por resulta den un atake celebral.
El a enfatisa cu, apesar cu e situacionnan por ta dificil, nos mes tin e control. Nos no mester laga e circumstancianan yega un punto cu nos ta perde ken nos ta. E por ta duro, pero si nos haci e cambionan necesario, nos por crea un ambiente mas trankil pa evita stress of burnout cu por resulta fatal.
Segun Señor Palm, mester mehora e cuido primario na Aruba pasobra ta parce cu cerca docternan di cas, e topico di atake celebral a wordo lubida. Esaki por ta pa motibo di falta di informacionnan cu nan ta haya di e patient. E ta conseha ciudadanonan tambe pa semper ta honesto cu doctor y conta cada sintoma, ki ora el a sosode, y kico a haci pa asina doctor por haci un miho evaluacion.
Fundacion CVA Aruba ta sigui traha pa reduci e cantidad di atakenan celebral na nos pais. Señor Palm a agrega cu pa aña 2026, e fundacion tin como meta pa organisa mas charlanan educativo y informativo y preventivo riba e topico hopi importante aki pa salud publico.
