Stellaris Casino y Aruba Marriott Hotel lo celebra en grandi 40 aña di ERA Autentico

ORANJESTAD (AAN):  Durante un conferencia di prensa, representantenan di Stellaris Casino na Marriott Hotel a haci un anuncio importante.

Yazira Feliciana, Marketing Director di e Casino a indica cu a sinta warda un par di siman cu e ansha di por anuncia kico ta bay tin dia 9 di Juli proximo ya cu a cuminsa anuncia esaki caba.

El a señala cu Stellaris Casino hunto cu Aruba Marriott Resort a anuncia cu nan ta bay ta celebrando e 40 aña di Era na Aruba unda nan ta creando un evento spectacular y unico caminda cu tur hende por yega na e evento e anochi aki.

Segun Feliciana, dia 9 di Juli ta bay experencia un evento di gala, VIP, cu pa hopi tempo, Aruba no a yega di mira.

"E ta bay ta un fiesta, un celebracion di 40 aña di ERA Autentico. Nan ta bay tey na Aruba dia 9 di Juli y esaki lo bay tuma lugar den e Aruba Marriott Ballroom y esaki ta wordo carga completamente door di Stellaris Casino", a expresa.

Tin hopi fiesta sin cu ta organisa un fiesta pa e hendenan di 45 aña bay ariba y esaki ta locual ta bay dedica na dje.

ERA Autentico ta un di e bandanan musical cu Stellaris Casino semper a traha cu ne y nan merece di haya su celebracion manera con a ser planea. E anochi aki kier duna un toke special caminda tur hende cu ta bay yega na e evento aki ta sinti cu e ta bay un celebracion di 40 aña, Yazira Feliciana a declara.

Ta bay tin dos banda mas e anochi aki, Musical Time y Oreo. Tur hende cu yega e fiesta aki ta bay ta un VIP, e ehecutivo di Stellaris Casino a bisa.

Mas detaye relaciona cu e tremendo evento aki lo wordo anuncia den e proximo dianan den DIARIO. Keda pendiente.