Vision di Betico Croes a habri porta pa maneho financiero historico awe
*Aruba no por a recupera di desastre financiero sin su propio maneho
*Despues di 15 aña paisnan Curacao y Sint Maarten cu nan moneda
ORANJESTAD (AAN) — Dia Prome di Januari 2026, Aruba lo celebra e logro historico di Status Aparte, e cambio estatal cu a comberti Aruba den un pais autonomo den Reino.
Na caminda pa e fecha grandi di Aruba, na 2024 Gobierno Evelyn Wever-Croes ta entrega na Pueblo di Aruba y na mundo, e prueba pakico e lider historico di Aruba Betico Croes, a entrega su alma y curpa na e lucha pa Status Aparte, cu awe ta e vehiculo principal di e logro di Aruba pa a recupera di desastre financiero.
Asina tambe awor, Gobierno Wever-Croes por bini cu un pakete social, cu bira inicio di e periodo, cu recuperacion Arubano ta bira realidad directamente pa e Arubiano.
E motibo cu den pasado, Pueblo di Aruba a exigi pa Status Aparte y asina e ta doño di su propio rikeza y destino como parti autonomo di Reino, ta bini dilanti den e realidad di e maneho di Gobierno actual y e cifranan cu Gobierno Wever-Croes ta prepara, pa na 2025 e Pueblo di Aruba directamente por probecha di e resultadonan favorabel di su sacrificionan pero tambe pa berdad por prevalece den historia politico di Aruba.
E lucha di Status Aparte tabata basa riba falta di igualdad di Aruba enfrente e islanan Antiano. Ademas e placa di e Arubiano pa medio di e areglonan den Reino, no tabata wordo uza directamente y na prome lugar pa bienestar di e Pueblo Arubano.
E lucha original pa separacion di Aruba for di Antia, a wordo kibra den Parlamento di Aruba cu representacion e tempo di AVP, cu a bay di acuerdo pa Curacao tin 12 asiento den Parlamento di Antia y Aruba 8 asiento, loke a haci cu semper Curacao lo tabata tin un mayoria den Parlamento, cu tabata dicidi pa Gobierno Central di Antia Hulandes.
Esaki tabata origen di e lucha di Betico Croes, teniendo cuenta cu e forma di reparticion di entrada di belasting na Antia Hulandes, caminda Aruba tabata tin participacion grandi sigur cu entrada di Lago.
Betico Croes a lanza su concepto di Status Aparte den un lucha heroico di e Pueblo di Aruba cu na 1983 a logra cu Reino a bay di acuerdo cu Status Aparte di Aruba dia Prome di Januari 1986.
Den e tempo cu Aruba a alcansa su logro, problema mundial den industria petrolero, a causa cu companianan grandi di petroleo a cuminsa cera refinerianan. Ta e hecho cu a anuncia cu refineria di Lago tambe lo a cera su porta, a bira e arma falso cu a wordo uza contra Betico Croes.
Mientrastanto historia ta mustra con e refineria di Shell na Curacao tambe a stop di existi a base di cambionan mundial.
Cu introduccion di Status Aparte, cu tabata su logro historico, Betico Croes a conoce traicion directo ora placa a bira e arma falso contra loke el a logra pa Aruba, cu na 2025 lo ricibi otro prueba di e forma cu Betico Croes a percura pa bienestar di Aruba.
Na 2025 Pueblo di Curacao y Sint Maarten, despues cu nan a bay di acuerdo pa basa nan futuro estatal riba e Status Aparte cu Betico Croes a inventa, lo mira cambio di nan moneda despues cu nan a keda pega na Florin Antiano, aunke Antia Hulandes no ta existi for di 2010.
Na 2025 un moneda di Curacao y Sint Maarten, cu a keda mara na otro riba tereno monetario for di 10 di October 2010, pa medio di nan Banco Central comun, lo mira luz den forma di e Florin Caribense cu lo reemplaza e Florin Antiano (sin un estado Antiano for di 2010) oficialmente.
E forma cu mester a regla asuntonan monetario di Curacao y Sint Maarten, cu a adopta e concepto basico di Status Aparte di Betico Croes pero no e relacion monetario entre nan dos, a tuma mas cu diez aña di e dos paisnan den Reino, cu ta mara na otro y no conoce e independencia monetario cu Betico Croes a sigura pa Aruba.
E Florin Arubano y e Banco Central di Aruba tabata e exigencianan di Betico Croes, cu mester wordo reconoce como e estadista di henter Antia Hulandes cu a wordo cambia cu su concepto.
Na 2025 tambe Aruba ta conoce e momento, cu e bon gobernacion cu como alma di Status Aparte, a wordo hiba pa Gobierno Evelyn Wever-Croes, lo tin resultado favorabel pa Pueblo directamente.
E maneho di Gobierno Evelyn Wever-Croes, completamente basa riba e responsabilidad hancra den Status Aparte, lo nifica cu e nivel di bida di Pueblo di Aruba, por sigui subi sin promesa falso y a base di realidad financiero nobo di Aruba.
Dia Prome di Januari 2026, Aruba lo celebra 40 aña Status Aparte, 40 aña Banco Central y moneda propio, cu solamente por worde pone na riesgo na man di gobernantenan Arubano mes, manera gobernacion 2009-2017 di Mike Eman a demostra!
