Tambe lo introduci un APP pa paga via telefon
ORANJESTAD (AAN) – Directora di DIMAS, señora Kathy Paskel, despues cu Minister Tjon a elabora, den conferencia di prensa, tocante e lanzamento di e proyecto “Self Service Payment Kiosk”, tambe a hiba palabra.
Señora Paskel a expresa cu e ta masha contento cu e team di ITC, cu a consisti tanto di DIMAS, Ministerio pero tambe di XA-Technologies y IBS, cu a traha, conhuntamente, pa lunanan largo pa por finaliza e proyecto y haci posible cu e clientenan di DIMAS por haci nan pago por medio di e payment kiosk aki, cu ta ofrece diferente beneficio.
Paskel a splica: “Ya caba tabata posibel pa diferente di nos clientenan haci nan pago via bell payment, of via transferencia, y tur esakinan tabata cay riba cuentanan bancario via nos colega di Departamento di Impuesto. Esey tabata haci cu nos mester a warda entre un pa tres siman, pa e pago wordo candela y pa siguientemente e proceso cana na DIMAS.
Haciendo e pago na DIMAS, na e payment kiosk aki, e ta haci posible cu e proceso ta start inmediatamente, pasobra e validacion di e pago ta sosode al instante, y asina e proceso a gana entre tres pa un siman cu por wordo haci mas lihe. Esey nos ta hopi contento cu ne”, Kathy Paskel a señala.
Paskel a agrega cu tambe DIMAS a gana pasobra den sentido cu hendenan ta haci transferencia na Departamento di Impuesto. “No tur ora nan tabata specifica bon pakico e pago ta wordo haci, y tin di e pagonan ey tabata cay den lo cual nan tabata yama ‘vage betalingen’ y esey tabata haci tambe cu e proceso na DIMAS tabata conoce un tardanza, prome cu el a sigui cana y cu nos por a haya confirmacion di pago”, directora di DIMAS a indica.
Paskel a bisa cu esaki ta e prome stap den e proyecto den loke ta e ‘payment gateway’ pa DIMAS. “E ta fisicamente akinan na nos oficinanan na DIMAS, y dentro di poco tambe nos lo tin un kiosk na MFA Savaneta. Fase 2 di e proyecto ta den ehecucion y pronto nos lo anunci’e y ta cu nos lo bay tin un app pa paga via bo telefon y tambe lo haci posible cu e pago lo wordo release di inmediato, cu e proceso por cana”, señora Kathy Paskel a duna di conoce.
