Ministro na Isla Ariba kier haya claridad prome cu duna fondo
ORANJESTAD (AAN): Manera a bira conoci di aña pasa caba, a drenta informacion cu Aruba Tourism Authority a opta pa no ta patrocinador mas di e evento cu ta tuma lugar pa hopi aña durante e dianan liber di ‘Memorial Day’ na Merca, esta Soul Beach Music Festival. E evento aki semper tabata percura pa un fluho di extra turista cu ta pasa henter un siman y e weekend principal na diferente actividad special traha pa nan.
Pero e patrocinio a stop, y e organizadornan di Soul Beach Music Festival a haya nan ta busca un otro lugar. Asina nan a dicidi cu ta bay na e isla unda 29 aña pasa nan a start cune. Esey ta isla di St. Maarten.
Pues Soul Beach Music Festival 2025 lo ta na St. Maarten, pero den fin di siman a sali algo dilanti cu ta mustra cu ainda e placa cu Gobierno di St. Maarten tin di duna pa e evento aki, no a wordo duna.
“Un estudio mas cla” tin di wordo haci pa haya sa pakico Soul Beach Music Festival no tey mas na Aruba, ta loke Ministro di Finanzas di St. Maarten, Marinka Gumbs a declara durante reunion cu prensa den Conseho di Ministro na Philipsburg. El a splica prensa cu e estudio aki ta necesario, pa asina Gobierno di St. Maarten por determina kico ta mihor pa e isla bayendo dilanti.
Ministro Gumbs a haci e declaracionnan aki durante sesion di pregunta cu prensa. Algo cu prensa a puntra tambe, ta e hecho cu Gobierno no a paga e fondonan pa e evento di St. Maarten Heineken Regatta di 2024, pero toch a haya placa cu a sobra pa paga Soul Beach Music Festival.
Aki e Ministro a contesta, ta cu ta e Ministro di Turismo ta esun cu a haya bon idea pa trece e iniciativa aki bek pa e pais, y cu e ta di acuerdo pa trece Soul Beach un biaha mas, como cu 29 aña pasa esaki a start na St. Maarten. Pues awor e lo bay ta nan di 30 aniversario.
“Nos a mira e beneficionan di dje na Aruba. Mi ta kere cu un estudio mas claro tin di wordo haci pa haya sa pakico el a stop na Aruba. Mi ta kere cu esey mester socede pa asina nos por compronde di con ora algo ta funcionando bon, pakico no a sigui cune, pa asina nos sa bayendo dilanti kico ta mihor pa St. Maarten den asunto di Soul Beach,” Ministro Gumbs a indica.
El a bisa tambe cu dentro di poco, Gobierno di St. Maarten lo ta firmando un MoU (memorandum of understanding) cu Fundacion SCDF (St. Maarten Carnival Development Foundation). “Mi ta pensa cu ademas di e factor di Soul Beach, ademas di e factor di Heineken Regatta, tin un factor mas y esey ta e factor di Carnaval, y mi ta bisa esey cu tur respet, pasobra ta parce di tin un sentimento cu Gobierno di St. Maarten no ta haciendo nada pa su mesun producto, su mesun producto cultural y esey ta Carnaval. Mi a compronde cu ta bay firma un MoU cu SCDF y Ministro di Turismo relaciona cu fondonan cu nan lo ricibi, y segun mi a compronde, esakinan ta fondo cu nunca a wordo ricibi door di SCDF. Mi ta ancioso pa e MoU aki pasobra e lo concientiza riba responsabilidadnan di tur hende, kico ta nan expectativa compara cu di nos, y ta sigur cu tur hende ta haya nan fair share di e bolo aki,” e Ministro a bisa.
St. Maarten ta planea pa inverti 700.000 Dollar pa ta anfitrion di Soul Beach Music Festival awor cu e ta bin bek St. Maarten. El a cuminza na 1995 como ‘Sinbad Soul Music Festival’. E analisis ta cu St. Maarten lo por haya bek 30 miyon Dollar riba e inversion ey. Pa casi 1/4 siglo Soul Beach tabata algo anual pa turismo na Aruba.
Ministro Gumbs a splica Parlamentarionan cu e parti Hulandes lo ta contribuyendo cu suma di $700.000 pa Soul Beach. E evento tabata planea original como un esfuerzo conhunto cu St. Martin frances tambe, pa hunto yega na un presupuesto di $1.400.000. Pero debi na dificultad di presupuesto, gobierno di St. Martin frances no por a participa cu fondo. Aunke ainda nan ta negociando cu e coordinador di evento, pasobra toch ainda nan lo por participa.
