Sistema di Hulpbestuurskantoor ta existi caba pa 65 aña na Aruba

Minister Evelyn Wever-Croes na celebracion

• Dia 1 December 1959 a inaugura prome HBK na San Nicolaas 

ORANJESTAD (AAN): Recientemente na MFA Savaneta, Prome Minister Evelyn Wever-Croes a atende e celebracion di 65 aña di Hulpbestuurskantoor, HBK. Prome Minister durante su discurso a conta un tiki di e historia di HBK y e motibo tras di esaki. 

   E motibo principal pa un Hulpbestuurskantoor tabata pa trece servicio mas cerca di e ciudadano pa asina e ciudadano por gana tempo teniendo e servicionan di gobierno cerca di cas. E prome diseño di e edificio d HBK tabata di aَña 1956 y e destaho publico tabata dia 17 december 1957.

   E construccion a dura 2 aña y na dia 1 december 1959 a inaugura Aruba su prome HBK na San Nicolaas oficialmente. E HBK di San Nicolas no solamente a trece un alivio pa e habitantenan di San Nicolas pero tambe a tabata un alivio pa e oficina prinicpal na Playa ya cu e fluho grandi di hende a desminui.

   Na September 1959, Biblioteca Publico a bay den e mesun edificio di HBK San Nisolas, sigui pa eilandsontvanger apenas 1 luna despues. Na december 1982 a toca pa Savaneta haya su HBK, na aña1983 na Santa Cruz y na aña1997 a habri HBK na Paradera. Cu e HBK-nan, gobierno a logra expande, promove, mehora y haci mas accesible tur servicionan di gobierno den tur districto.

   Na e momento aki HBK ta bayendo den un era digital y lo ta digitalisando procesonan di gobierno pero semper considerando esnan cu no tin acceso na un computer of no tin tur conocimento di maneho di esaki. Pa nan lo tin empleadonan na HBK-nan pa duna asistencia cu e servicio cu nan mester.

“For di profundo di mi curazon, mi ta gradici cada empleado di HBK pa e servicio y aporte continuo na nos habitantenan.

   Boso ta e cara di gobierno den e forma mas palpable y tangible. Sigui haci boso trabao cu mes amor cu boso a bin ta haci durante añanan. No ta tur dia boso trabao ta facil, sinembargo e smile no ta kita for di boso cara pasobra boso tin un tarea pa cumpli cun’e. Sigui duna servicio di calidad, y ban sigui haci historia hunto”, Prome Minister a expresa.