Diego de Cuba di STA:
ORANJESTAD (AAN): Presidente di Sindicato STA, señor Diego de Cuba, den entrevista recien cu DIARIO a indica cu Sindicato STA otro aña lo start sali cu negociacionnan di CAO mirando cu lo ta e ultimo aña di e CAO di Triple NV. Segun señor de Cuba, ya STA a cuminsa fula tera y no por bay ni mas abou di locual cu tin tampoco por ‘break even’, sino solamente por bay mas halto.
Mirando e situacion di aeropuerto aworaki, señor de Cuba a remarca cu Triple NV no por bay bisa cu no tin placa. STA ta consciente cu tin hopi gasto pasobra e Proyecto 2030 a dura mas di loke e mester a dura. El a agrega cu proyecto grandi manera esaki semper por encontra problemanan. Segun el a duna di conoce, e personanan cu nan a deshaci di nan durante reorganizacion tabata personanan clave cu por a yuda pa e proyecto cana mas lihe.
Den reunion cu Minister Wendrick Cicilia, STA a vocifera su preocupacion y opinion di tur loke a pasa na aeropuerto. Segun de Cuba, STA ta sinti cu den aeropuerto tin algo straño cu ta pasando y tin un clique cu den opinion di STA, si e no wordo kibra, e lo por trece problemanan grandi den futuro pa aeropuerto pasobra ya e ta treciendo problema caba.
Segun de Cuba, hopi empleado ya caba a cuminsa ripara esaki, cu nombramentonan descabeya cu a tuma luga na aAropuerto. Hendenan sin ningun clase di experiencia a wordo poni den posicionnan clave y hopi importante, sin cu nan tin e conocemento. STA ta contra di e decisionnan aki.
