Parlamentario John Hart (AVP):
ORANJESTAD (AAN): Parlamentario John Hart di fraccion AVP ta sigui reforsa e contactonan strategico di Aruba den Reino despues di un bishita di trabou hopi productivo na Den Haag durante siman pasa.
Hart a tuma parti den e reunionnan di Interexpo, hunto cu su colega di fraccion y Presidente di Parlamento, Sr. Marlon Sneek, na unda nan a representa Aruba den dialogonan importante pa futuro di e isla.
InterExpo 2025 ta un plataforma diplomatico-economico anual cu ta reuni lider politico, empresarial y academico for di Aruba, Corsou, Hulanda y otro entidad di Reino. E evento ta enfoca riba intercambio di conocemento, discusion di reto y oportunidad comun, y fortalecemento di relacionnan strategico den cuadro di Reino Hulandes.
Segun Hart, e bishita tabata “sumamente exitoso” caminda a duna e oportunidad pa, no solamente papia cu lidernan cu tabatin un rol fundamental den construccion di Reino Hulandes, pero tambe pa interactua cu e lidernan di futuro cu lo tuma decisionnan crucial den añanan cu ta bini, manera ta lider di D66, Rob Jetten.
“Nos a haya un atmosfera habri y di respet mutuo,” Hart a indica. “E tipo di plataforma cu Interexpo ta crea ta esencial pa Aruba tin un bos pa loke ta temanan di Reino.”
Durante e bishita, e delegacion di AVP a keda invita na diferente encuentro strategico, entre nan un reunion sumamente valioso cu Jan Peter Dijkman, director di e Wetenschappelijke Instituut di CDA.
Dijkman no ta figura desconoci pa Aruba, pues el a bishita e isla durante un seminario organisa pa Fundacion Mito Croes na Cas di Cultura. Hart a bisa cu e tipo di contacto aki ta consolida un laso fuerte entre Aruba y politica Hulandes pa loke ta trata temanan di Reino.
Fraccion AVP ta pone enfasis grandi riba importancia di tene un relacion strategico estrecho cu miembronan di Tweede Kamer, manera Hart a splica: “Ora cu nos ta trata asuntonan di Reino—señalnan cu ta afecta nos pueblo directo—ta vital pa tin bon comunicacion, respet mutuo y un base di confianza cu esunnan cu ta tuma decision.”
Parlamentario Hart ta mira e bishita manera un paso mas den un trayecto continuo pa defende e interesnan di Aruba den Reino Hulandes, sigurando cu bos di nos isla ta keda sinti den lugarnan caminda decision ta wordo tuma.
