Minister Dangui Oduber:
ORANJESTAD (AAN) – Un punto hopi importante cu ta forma parti di e maneho y vision di Ministerio di Salud Publico, ta inverti den prevencion.
Asina Minister Dangui Oduber a menciona den conferencia di prensa di Diahuebs. E dignatario a subraya cu esey ta loke su ministerio ta haciendo y enfocando riba dje. Tin recomendacionnan den e direccion aki, tambe di Raad van Advies y di IMF. “Y nos tur ta conciente cu si nos no cuminza inverti y tuma accionnan concreto riba prevencion, e fondonan di AZV ta bira impagabel, pasobra nos tin un comunidad cu no ta asina saludable y pesey tambe nos tin nos Plan Nacional di Prevencion, cu ya caba nos a lanza. Nos tabata na AZV algun tempo pasa pa papia riba cuater pilar cu nos ta bay enfoca riba nan y sigur un di nan ta ‘Aruba Healthy Life Center’ cu ta dirigi na personanan cu tin obesidad, y cu si tur cos ta bon, nos ta den e fase final pa lanza esaki oficialmente”, e dignatario a relata.
Minister Oduber a agrega cu e ta bay sigui sostene e proyecto piloto dirigi na muchanan entre 4 cu 18 aña, cu tambe ta confronta cu problemanan di obesidad, y lo amplia e cantidad di scolnan cu ta participa den e proyecto “Scol Saludable”. Gobierno kier pa mayoria scol participa den e proyecto aki activamente, y ta bay bin tambe cu diferente campaña di concientizacion.
Finalmente, e mandatario a bisa cu nan a enfoca riba e tema di Salud Mental y verslavingzorg, cu tambe a bin dilanti, aunke e no ta resorta mas bao Ministerio di Salud, sino Ministerio di Husticia. Pero den palabracionnan concreto cu a haci cu e Ministerio di Husticia den un Samenwerkingsovereenkomst, nan ta trahando hopi alinea y estrecho cu otro pa atende cu e problemanan aki.
E mandatario a conclui bisando cu e lunanan nos dilanti tin hopi trabao pa haci, riba tereno di salud, cual trabaonan a cuminza na 2019 caba, y mirando e importancia pa garantiza cu e pakete cu AZV ta brinda, ta keda sostenible, no obstante e presion cu lo bin di Hulanda pa motibo di e financiamento cu mester a haya y cu nan a duna instruccion di bay corta 60 miyon na cuido, los di esaki semper ta importante pa percura pa AZV traha mas eficiente y eficaz pa keda garantiza cu lo por keda brinda e cobertura di cuido medico cu nan ta brindando.
