Arubianonan furioso ta pidi pa no hinca Betico Croes den wega politico barata - *Si no ta pa Betico Croes ainda Mike ta pega den e situacion di 12-8 di Antia
ORANJESTAD(AAN)—Manera por a spera, durante e siman cu a termina, cierto partidonan a pensa cu nan por a uza lodo pa influencia votadonan.
Nan nivel politico a baha mas abou cu suela y tin cu a yega beerput manera e siman aki ya DIARIO a denuncia.
Ta sumamente tristo cu e siman aki, un redashi y calumnia sushi di AVP den pasado, a wordo uza dor di un agente special di AVP, cu asina kier destrui hasta e imagen di Betico Croes enfrente hobennan.
E abuso contra memoria di e lider di Aruba, a cay den hopi mal tera cerca Arubianonan cu a acerca DIARIO pa mustra cu hustamente awor cu Aruba ta prepara pa bay urna electoral pa scoge su miembronan di Parlamento, tin partido cu sigur mester cera nan boca.
Topico den cas di Arubianonan, cu no a biba di loke nan pais a haci pa nan pero a lucha pa nan, ta sigur e abuso cu a haci contra memoria di Betico Croes, cu ta e Arubiano cu a haci posibel pa awe Aruba por bay urna electoral pa scoge miembronan di e propio Parlamento di Aruba.
Nan a pidi pa recorda e grupo cu awe kier exigi tur clase di posicion pa no lubida, cu si no ta pa Betico Croes lo no tin Parlamento di Aruba ni Gobierno di Aruba.
Sin Betico Croes, Aruba lo a keda pega den e traicion cu a wordo comete dor di AVP contra Aruba. Nan a mustra cu AVP sigur mester bay sconde ora papia di Parlamento di Aruba.
E pregunta grandi di nan ta, si no ta posibel cu ta berdad historico ta duna Mike Eman miedo di drenta Parlamento di Aruba, un instituto cu a wordo traiciona prome cu el a nace.
Nan ta mustra cu Mike Eman no mester lubida, cu ta su famia a traiciona e lucha di Aruba y a haci cu no solamente Aruba a keda pega den Parlamento di Antia, pero cu Aruba a wordo pone bou pia di Willemstad door di AVP den Parlamento di Antia.
Si no tabata pa Betico Croes, cu tin un nomber limpi, Aruba hamas lo tabata tin su Parlamento pasobra AVP a traiciona Aruba y a yuda kibra e representacion igual di Aruba y Curacao den Parlamento di Antia, caminda Aruba a keda rehen te na momento cu Betico Croes a logra Status Aparte di Aruba.
A recorda Mike Eman y tur e soldatnan di AVP, cu ta kere cu nan lodo por destrui otro, cu si no ta pa Betico Croes no tabata tin ni Parlamento ni Gobierno di Aruba y ni Mike ni Henny lo a haya oportunidad di yama nan mes Prome Ministro di Aruba.
E pregunta ta keda, si no ta e peso di concenshi di 12-8 ta haci cu Mike no kier a drenta Parlamento di Aruba pero a keda scondi te na momento cu atrobe accion di Husticia ta pone AVP na careda.
