ORANJESTAD (AAN) — Minister Presidente Evelyn Wever-Croes, como su di tres punto di agenda den conferencia di prensa Diahuebs, ta un recordacion di e aspectonan cu mester tene cuenta pa Eleccion 2021 cu ta awe,
Diabierna 25 di Juni, cu un sugerencia na e votadornan pa contribui cuu evita aglomeracion.
“Na e momento aki ta importante caba pa bo tin bo identificacion (ID) y bo carchi di voto na man”, Prome Minister a menciona, y seguidamente el a para un rato riba e siguiente aspectonan:
CARCHI DI VOTO: “Tur hende a haya un carchi di voto na nan cas, na e adres registra na Censo. Esnan cu no a haya nan carchi di voto por acudi na Censo pa haya un duplicado. Riba bo carchi di voto, bo ta haya tur informacion y e number di urna cu bo tin cu acudi na dje. Corda cu tin algun urna cu a wordo cambia door di Conseho Supremo Electoral, pa asina reparti e cantidad di personanan reparti riba mas urna, pa asina nos tin menos aglomeracion.
Pues wak bon ki urna bo mester bay, pasobra tin hende cu nan urna a cambia.
ORARIO: “Na di dos, corda cu e orario di votacion ta di 8 or di mainta te 7 or di anochi, despues di 7 or ningun hende por vota mas, y prome cu 8 or, tampoco.
Pero riba e stem card tin un horario di sugerencia. Esaki a wordo haci, pa asina evita aglomeracion. Si tur hende sigui e orario di sugerencia, no ta bay tin aglomeracion durante e dia, y no mester warda den fila tampoco, pa vota. Sinembargo, esaki a wordo traha den tempo cu nos tabata tin cifranan di contagio ainda, y awo e situacion ta otro. Pues aworaki, si bo no por vota den e horario sugeri, bo por bay cualkier otro ora na bo urna, entre 8 or di mainta y 7 or di anochi.
DOCUMENTO DI IDENTIDAD: “Tur hende cu ta bay vota cu su carchi di voto, mester identifica su mes. E presidente di urna mester por establece cu abo ta e persona cu ta poni riba e stem card, cu tin derecho di voto. Pues, ta importante pa bo wak cual ID bo tin cu ta valido y corecto. Si bo tin un passport valido bay vota cune.
Si no, bo por bay vota cu e cedula valido, y si no tin bo por bay vota cu bo rijbewijs si e ta valido. Si e rijbewijs ta di esnan color rose cu bo por a saca e tempo aya den warda di polis na Santa Cruz, tin chens cu tin algun di nan cu tabata fout. Wak’e bon. Si esey ta bo unico metodo di identificacion wak si bo nomber, y si e pais y fecha di nacemento ta corecto. Si nan ta corecto, e ora ey bo por vota cu bo rijbewijs tambe”, e dignatario a conclui, cordando comunidad cu e derecho di voto ta un derecho fundamental y sagrado.
