Sharlena di Aruba a gana titulo di Miss Tourism World 2021

ORANJESTAD (AAN): Recientemente e dama hoben local Sharlena a competi pa na un certamen internacional cu a socede na Aruba mes.  Varios participante a bin den exterior pa e evento di Miss Tourism World.

   E bon noticia ta cu Sharlena a bay cu e titulo tambe!

   DIARIO a compronde cu Sharlena a prepara pa varios luna largo pa cu esaki, y door di pandemia a hala e certamen pa October.

   Esaki a encera tambe, un siman largo di diferente actividad nan y tambe competencia nan manera Fashion y Costume.

Tur candidata a hospeda den Eagle Aruba Resort.

   E persona nan cu a compaña Sharlena durante e siman tabata su hair and makeup artist Rosangelika Cespedes, su director Robin Croes y su mama Nini Peña cu a yega di exterior pa wak Sharlena concursa.

   Na final di anochi den Cas di Cultura, Sharlena a bay cu tur premio y tambe gana e titulo maximo Miss Tourism World 2021.  El a haya premio tambe di Fotogenica, Trahe Fantasia, Trahe di Gala, Trahe di Baño, y Pasarela.

   E ganadora pa e otro categoria, esta ‘Teen Tourism World’ a bay pa e candidata Marlê Hindermann di Paraguay y ‘Mrs. Tourism World’ a bay pa e representante di Merca.