Miguel Gonzalez Perret-Gentil di Wardacosta
ORANJESTAD (AAN) Miguel Gonzalez Perret-Gentil, kende ta PR di Wardacosta di Caribe Hulandes, den un entrevista reciente a recomenda pa comunidad prepara bon pa e temporada di tormenta of horcan. Señor Perret-Gentil ta enfatisa e importancia pa tur ciudadano tuma e precaucionnan necesario pa proteha nan mes y nan propiedad.
Segun señor Perret-Gentil, un di e pasonan principal ta busca informacion y scucha solamente for di fuentenan oficial y sigur, manera CMO (Crisis Management Office) y Meteo Aruba, cu lo informa pueblo regularmente tocante e desaroyo di e tempo riba nos isla.
Pa e doñonan di boto, señor Perret-Gentil ta conseha pa mara nan boto di un manera sigur, of si ta posibel, saca nan for di awa. E ta sugeri pa mara nan na un caminda cu nan no lo sufri daño den caso di mal tempo. Ademas, e ta recorda pa verifica cu tur articulo di siguridad riba e boto ta presente, funcional y up-to-date.
E oficial di Wardacosta a enfatisa cu nan regularmente ta haci control y ta duna recomendacionnan necesario na doñonan di boto, pa nan sa kico nan mester tene na cuenta den caso di mal tempo. Sinembargo, el a menciona tambe cu siguridad di e personal di Wardacosta ta igual di importante, y mester wordo considera den e tipo di operacionnan cu nan por haci durante un tormenta. Den caso cu bida di hende ta na peliger, Wardacosta lo evalua e situacion y actua segun e necesidad.
Pa emergencia, pueblo por comunica directamente cu Wardacosta na telefon 913.
