ORANJESTAD (AAN): Durante su recien bishita na Aruba, Secretario di Estado Eddie van Marum a entrega un beschikking oficial na Prome Minister Mike Eman,
marcando un paso importante den colaboracion entre Aruba y Hulanda pa trata cu sinceridad nos historia comparti, incluyendo e periodo doloroso di sclavitud.
Segun Prome Minister Eman, e proceso cu Aruba y Hulanda a pasa ultimamente ta un motibo di satisfaccion y animo, mirando cu esaki a permiti ambos pais papia cu curason habri y reflexiona riba un pasado cu den hopi momento a dividi nos. A logra haya otro den un proceso di pensa riba e pasado locual ta yuda determina nos direccion pa futuro, basa riba e pasado comparti y momentonan dificil, pero cu consciencia cu tur hende ta humano y ningun hende ta sin pica.
E beschikking ta inclui un compromiso pa yuda cierto proyecto na Aruba, entre otro: (*) Re-imprimi un buki balioso riba historia di sclavitud na Aruba. (*) Creacion di un estatua conmemorativo. (*) Organisa evento pa aumenta conscientisacion riba e tema di sclavitud. (*) Financia un localidad nobo pa Archivo Nacional di Aruba.
Prome Minister Eman a subraya cu Archivo Nacional tin un papel crucial den investigacion y reflexion riba nos pasado di sclavitud. Tin un conexion directo entre un archivo nacional profesional y completo y e conocemento di pasado cu mester sigui investiga. Ta fundamental pa por uza e informacion obteni pa defini e futuro.
Durante e reunion, Prome Minister Eman a duna Secretario di Estado van Marum un presentacion di e plan pa renoba e tankinan di awa di Kibaima, cu lo bira e centro pa warda e archivonan nacional y tambe un museo dedica na historia di sclavitud. Eman a gradici van Marum pa e beschikking cu, segun e, lo yuda cu un meta hopi balioso pa Aruba.
Secretario di Estado Van Marum a duna di conoce cu no por cambia e historia, pero por siña di dje si. Mester wak pa dilanti y tene e partinan scur di pasado, leu for di futuro.
Roald Lapperre, Director-Generaal Koninkrijksrelaties, a agrega cu den e proceso, mester a siña scucha otro, pasobra e perspectivanan tabata hopi biaha diferencia riba e historia comparti. Sr. Lapperre a keda hopi impresiona cu e manera cu Archivo Nacional di Aruba a lidera den region, y cu lo yuda otro isla pa haci nan archivonan mas accesibel door di digitalisacion y uzo di software special cu por interpreta manuscritonan di antes. Esaki lo duna oportunidad pa pueblo studia su mes historia di un manera hopi mas profundo.
