Santa Rosa a scoge e dos ganadonan di e reto di nombernan di Pisca

ORANJESTAD (AAN):  Diabierna 28 di Februari 2025, sr. Randy Maduro di Departamento di Agricultura, Cria y Pesca,

conoci popularmente como Santa Rosa, y alabes miembro di Fundacion Centro di Pesca Hadicurari, a haci entrega na e unico 2 ganadonan cu a completa e reto recien di nombernan di pisca.

            Como parti di su tarea pa aumenta concientisacion Santa Rosa a bin ta publica boletinnan informativo riba su pagina di facebook nombernan mas comun di pisca na Papiamento, esunnan conoci di Aruba.

            E serie di relatonan a bin ta gara bon acohida unda hopi hende ta sigui esakinan y ta hasta comenta constructivamente.

            Recientemente Santa Rosa a publica un afiche cu e diferente pisca, miembro di famia pargo of snapper (ingles) y a duna oportunidad pa manda e contestanan corecto y ricibi un premio cortesia di Fundacion Centro di Pesca Hadicurari.

            Dos persona a cumpli cu e desafio aki cabalmente y a bay cu e premionan. Sra. Graciela Nedd y sr. Francis Alexis Geerman tabata e ganadornan. Nan a ricibi un pakete cortesia di e Fundacion Centro di Pesca Hadicurari cu ta yuda promove entre otro seguridad riba lama y den e caso aki conoce piscanan mas popular di Aruba.

            E pakete ta consisti di un tas waterproof, celular waterproof, pechi protector contra solo, bril contra solo, yabero flotador, yabero pa habri boter y un spiel di emergencia. Tur esaki den e cooperacion estrecho entre e dos instancianan aki den cuadro di un plan strategico pa largo y mediano plazo pa yuda e Sector Primario y particularmente pesca rond Aruba.

            Pabien na e ganadonan. Pa esnan cu no a logra keda pendiente pa e siguiente rond di desafio cu pronto lo inicia.