Sala di yegada di Inmigracion na Aeropuerto tambe lo bira mucho mas grandi

E ta poni pa wordo construi den siguiente Fase - ORANJESTAD (AAN): E ta algo cu turistanan ta kehando no djis riba social media, pero tambe directamente na funcionarionan di Aeropuerto. 

Nan ta referi na e rijnan largo cu tin pa pasa door di Inmigracion di Aruba, despues di tabata oranan largo di cansancio den avion.

   E bon noticia di Diaranson atardi duna door di Ministro Dangui Oduber, ta cu e sala di yegada aki tambe lo bay bira mucho mas grandi.  Pero esaki lo no socede den Fase 1-A aworaki, sino un ‘futuro fase’.

   Esey ta loke e titular di Turismo, a declara Diaranson atardi durante un conferencia di prensa na final di un site-visit cu el a haci pa mira con e proyecto di construccion ta andando.

    Durante e trabao aki lo bay purba na minimaliza tur estorbo na e fluho di pasaheronan, principalmente esnan cu ta yega of sali den weekend na Aeropuerto.

   Joost Meijs di AAA NV cu ta maneha Aeropuerto, a mustra cu nan calculo ta cu pa fin di 2021, e vliegveld aki lo recupera como 72% di pasaheronan compara cu 2019.  E proyeccionnan pa 2022 ta cu e lo bira uno hopi bon, unda lo bay recupera 92% compara cu 2019.

   Gateway 2030 ta bin pa trata na trece un mihor experiencia di e viahero, como cu ta expande e Aeropuerto y lo bin cu un sistema di procesa/forward maleta cu ta state-of-the-art y lo bira hasta un di e mihornan na mundo.

   Fase 1-A lo finaliza den prome mitar di 2024, y despues di esey lo por start e siguiente Fase (sea Fase 1-B of Fase 2).  Den esey tin planea pa construi 2 jet-bridge mas (slurf pa avion), y tambe e Sala di Yegada mas grandi dilanti Inmigracion.