Advertencia Comandante di Marina Real ta sostene alarma di DIARIO
- Na 1978 a introduci e frontera maritimo Venezuela y Antiya Hulandes
- Tur atencion di Hulanda ariba Ukraine y no ariba e peligro Venezolano
ORANJESTAD (AAN) E siman aki e advertencianan di DIARIO pa mas control y proteccion di costa di Aruba contra peliger cu entrada via laman por a crea pa Aruba, a wordo fortifica directamente dor di e Comandante di Marina Hulandes, kende a adverti cu Venezuela ta forma un amenaza serio pa seguridad di e islanan Aruba, Bonaire y Curacao.
El a mustra con for di Venezuela por lanza tironan contra Aruba y cu na forma facil Venezuela por invadi Aruba.
DIARIO na varios ocasion a papia ariba e asunto aki y entre otro cu e proyecto Citgo a mustra ariba e peliger pa Nicolas Maduro haya poder economico absoluto ariba Aruba.
Un caso cu a haya mas atencion ora Merca a kibra su relacionnan cu Venezuela y Nicolas Maduro a wordo busca hunto cu personanan importante di su Gobierno cu tabata na Aruba.
Na varios ocasion DIARIO a bati alarma serio pa e poder economico di Nicolas Maduro na Aruba y a recorda con Nicolas Maduro mes a splica cu Aruba ta den e awanan teritorial di Venezuela.
Awe cu e alarma di e Comandante di Marina Real, e peliger ta wordo poni na un nivel mucho mas serio no pa motibo solamente cu den pasado Oranjestad a wordo invadi pa un grupo revolucionario cu despues di nan asalto a huy.
E peligro di Venezuela pa e islanan di Reino dilanti costa di Venezuela a haya su culminacion for di 8 di Juni 1929 ora cara di Reino Hulandes a keda na berguensa mundial pa e forma cu e revolucionario Venezolano Rafael Simon Urbina hunto cu 45 sostenedor a ataca e centro gubernamental di Reino Hulandes na Curacao.
Un scandal a mira luz na e momento cu e rebelde Venezolano a logra drenta haf di Curacao, un rato prome cu e cadena cu e tempo tabata proteha haf di e pais den e horanan di anochi, lo a wordo conecta entre e dos partinan di Willemstad na entrada di e haf y asina stroba barconan di guera.
Reino Hulandes a perde su cara mundialmente ora e rebelde Venezolano Rafael Simon Urbina a apodera di Fort Amsterdam, baha Gouverneur Leonard Fruytier for di e Cas di Gobernador y a mande Venezuela ariba e barco Mericano, Maracaibo, cu e revolucionarionan a horta.
Venezuela a podera di e centro di gobernacion di islanan Hulandes den Caribe, cu tabata situa den Fort Amsterdam na Curacao y cu a wordo libera te e siguiente dia ora portanan di prison a wordo habri pa tur funcionario di Gobierno Hulandes, cu a wordo detene dor di Urbina.
E portret di DIARIO di Urbina y su hendenan, a wordo prome publica na Venezuela y awor a perde su proteccion despues di sesenta aña. Pero e ta mustra claramente e revolucionarionan.
Pa Reino Hulandes e suceso tabata un berguensa, pero tambe un advertencia serio pa loke por pasa na Aruba y e asalto di Oranjestad, sigur a duna prueba.
Cu mester a regla e teritorio maririmo Hulandes den Caribe na un forma adecuado semper tabata na discusion pero ta na 1978 por a yega na un areglo pa e fronteranan maritimo entre islanan Hulandes den Caribe y Venezuela.
Awe un advertencia oficial di e Comandante di Marina Real, ta resona pa atende cu e peliger serio pa sigur e islanan ABC, manera na tanto ocasion DIARIO a trece dilanti.
E forma cu tur atencion den Reino ta dedica na Ukraine y otro partinan di mundo, mientras e amenaza pa Aruba ta crece, tin preocupacion di e militar halto Hulandes kende realmente ta ripiti e peticionnan di DIARIO pa atencion wordo duna na e realidad di Aruba sigur dilanti costa Venezolano y e actitud di Nicolas Maduro enfrente e forma cu kier transforma Guyana den propiedad di Venezuela.
DIARIO lo sigui informa Aruba ariba tur tereno importante pa Aruba, na un momento sumamente serio na mundo y sigur Reino cu obligacion cu Europa cu no por stroba su responsabilidad enfrente su teritorionan den Caribe.
