Señor Edsel Figaroa, Presidente Sindicato TOPA
ORANJESTAD (AAN): Señor Edsel Figaroa, Presidente di Trahadonan Organisa di Sector Publico di Aruba (TOPA), a expresa cu gran orguyo durante un entrevista cu DIARIO cu sindicato TOPA a logra, pa prome biaha, firma un Convenio Colectivo Laboral (CAO) pa un periodo di cinco aña. Señor Figaroa a remarca cu e no ta na haltura cu un otro sindicato a logra esaki prome.
Señor Figaroa a splica cu apesar tin preocupacionnan cu e termino di 5 aña ta hopi largo y no sa kico por pasa den 5 aña, sindicato TOPA ta kere cu e CAO aki ta brinda trankilidad di 5 aña pa trahahornan. Tin un aumento di 3 aña den salario y dos aña e trahadornan ta haya un sorto di lumpsum. “Cu esaki, trahadornan ta traha trankil, lanta contento pasobra nan no mester preocupa of prepara pa lucha pa bolbe bin cu un CAO nobo”, señor Figaroa a expresa.
E otro parti, e presidente di TOPA a añadi ta, cu pa gerencia tambe esaki ta bon pasobra nan tin tempo pa plania y pa haci cambionan pa mehoracion pa aki 5 aña por sigui negosha cu TOPA.
Segun señor Figaroa, e logro di mas grandi di e CAO ta cu awo trahadornan nautico por ta trankil pasobra awo nan ta wordo trata igual cu tur otro trahador manera debe ser. E proceso di con pa kita un trahador y of con pa yega na un areglo si en caso nan wordo afgekeurd, awo ta conta igaul mescos cu pa tur otro trahador.
