Reunion fructifero entre educadornan di hospitalnan di Caribe Hulandes

HOH orguyoso di ta parti di aliansa importante aki

ORANJESTAD (AAN):  Recientemente a bini hunto e diferente educadornan di hospitalnan y centronan di cuido di Caribe Hulandes pa asina celebra un logro grandi. Danki na e colaboracion cu Amstel Academie, Dutch Caribbean Hospital Alliance (DCHA) y Ministerio di Salud Publico, Bienestar y Deporte (VWS), a logra educa 1500 profesional di cuido den e region Caribe Hulandes.

            Ademas, e educadornan di hospital a formula diferente plan pa futuro pa asina duna e colaboracion un caracter sostenibel.

            Desde 2021, e educadornan di diferente hospital y centronan medico na Aruba, Boneiro, Corsou, Sint-Eustatius, Sint-Maarten y Saba a uni forsa. Danki na e colaboracion cu Amstel Academie, DCHA y subsidio di Ministerio di VWS, enseñansa avansa den cuido a bira posibel. Esaki tabata fondo specialmente reserva pa educacion relaciona cu cuido agudo, pa asina e islanan ta miho prepara den momento di crisis, manera un pandemia. Inventarisacionnan y investigacionnan a wordo haci y a tene hopi reunioncu tur partner pa por a logra esaki.

            E proyecto cu ta hiba e nomber Caribbean Health Academy (CARIBHA) a logra educa 1500 profesionalnan di cuido den loke ta ‘kinisch redeneren’ y tambe nurse specialisa den emergencia, IC-, CCU, nurse specialisa den diabetes, anestesia, etc.

            Debido na e colaborashon exitoso entre e educadornan di hospital CAS-BES, a tuma e decision pa reuni fisicamente pa evalua e cooperacion actual, celebra e logronan y papia tocante futuro colaboracionnan. Pa e reunion aki Fundashon Mariadal Boneiro (FM) a pone su hospital na disposicion y Horacio Oduber Hospital Aruba (HOH) tabata encarga cu organisacion di e dianan intensivo aki.  Durante dos dia largo, Amstel Academie a tene sesionnan di evaluacion y inspiracion, despues di cual HOH a carga un sesion di strategia y vision solamente cu e educadornan pa traha riba e plannan pa futuro. Nos a evalua hunto e necesidadnan di educacion pa e añanan venidero pa asina hunto adkiri e diferente cursonan aki cu tin tambe como beneficio bahamento di gasto y claro mantene e conexion entre e islanan. Ademas, e educadornan a duna presentacion riba desaroyonan di enseñansa riba nan isla cu por ta un inspiracion pa otro.

            E evento a finalisa cu un celebracion, unda un parti grandi di esnan envolvi a tene un discurso. E presidente di e aliansa aki, profesor Lenie Denteneer di HOH Academy, a habri e celebracion, despues a sigui presidente di DCHA, dokter Giovanni Frans di Fundashon Mariadal y tambe VWS pa medio di un mensahe di video a manda solamente palabra di aprecio pa e tremendo cooperacion aki. Amstel Academie a cera e evento y a refleha riba e progreso enorme cu nan a logra hunto den tur e añanan. Finalmente, tur presente a brinda pa e tremendo cooperacion y pa tur loke tin planea pa logra hunto den futuro.