Respaldo a brinda curso di resistencia no-violento y autoridad obligatorio na empleadonan

ORANJESTAD (AAN): Resistencia no-violento conoci como ‘Geweldloos Verzet’, ta un metodo pa yuda famianan enfrenta comportacion dificil di muchanan.

   ‘Geweldloos Verzet’ ta un metodo desaroya pa Haim Omer di Israel cu ta yuda mayornan maneha e comportacion dificil di nan yiunan, duna mas forsa y confianza y reduci e sentimento di impotencia. E metodo ta basa riba un combinacion di autoridad obligatorio (‘verbindend gezag’), cu ta enfoca riba mantene conexion y contacto positivo cu e yiu, mientras ta pone un limite fiho contra comportacion inaceptabel.

   Na Aruba, un curso intensivo a ser duna na e profesionalnan di Respaldo pa domina e tecnica aki. E docentenan, esta Drs. Elian Wiebenda y Dr. Hans Bom, kendenan ta psicologo clinico (klinisch psycholoog) y terapeuta di sistema (systeemtherapeut) cu mas di 17 aña di experiencia na Lorentzhuis, un centro di terapia na Hulanda, a yega pa trece nan conocemento y experiencia na e team di Policlinica di mucha y hoben na Respaldo Aruba.

   Segun e docentenan, un gran enfasis a ser poni riba e actitud di e profesional na momento di duna e terapia. Un intervencion ta bira mas valioso ora e ta ser aplica cu e actitud corecto. E curso a inclui diferente tayer y practica, caminda e cursistanan a mustra hopi interes y un deseo fuerte pa siña algo nobo.

   Pa e docentenan e curso tabata un exito na momento cu e cursistanan a indica cu nan a descubri e ‘poder di silencio’ (un herment poderoso cu por yuda na crea cambio sin hopi palabra). Normalmente e profesional a purba di papia hopi cu e cliente, pero cu e metodo aki ta worde uza menos palabra posibel. E docentenan ta spera cu e profesionalnan di Respaldo por aplica esaki den nan trabao cu famianan, pa dunanan hermentnan necesario cu nan mester pa yuda nan famianan.

   E curso a bira posibel danki na e contacto di Dr. Ushi Moreta, psikiatra di mucha y hoben na Respaldo, cu a cera conoci cu e metodo aki na Lorentzhuis y a invita e docentenan pa trece e metodo na Aruba pa un grupo mas grandi.

E curso ta un paso importante pa duna profesionalnan di Respaldo e hermentnan pa duna mayornan na Aruba un manera mas fuerte y efectivo pa maneha situacionnan dificil cu nan yiunan.