Representante encarga cu proyecto di Eagle LNG a duna splicacion di proyecto di gas natural

ORANJESTAD (AAN): Diaranzon atardi na MFA Savaneta a tuma lugar un Townhall meeting,

unda cu entre otro un representante di Eagle LNG a duna un splicacion riba e proyecto di gas natural cu ta bay wordo uza pa genera coriente pa Aruba.

            Alejandro Bastardo, e representante di Eagle LNG encarga cu e proyecto pa Aruba a cuminza na bisa cu e session a wordo organiza pa informa publico en general di detayenan di e proyecto y pa tende locual ta nan inkietud.

            “Scuchando entre otro e inkietudnan cu habitantenan di Aruba por tin, nos por incorpora esaki tambe den e estudio cu ta wordo haci riba e impacto riba medio ambiente”, segun Bastardo.

El a duna un presentacion den cual el a splica cu e gas natural cu ta bay wordo treci pa Aruba ta pa genera coriente pa WEB Aruba N.V.

            “E compania actualmente ta haci uso di fuel oil (heavy fuel oil) pa genera coriente y ora cu e proyecto keda cla, gas natural ta bay reemplaza uso di fuel oil, unda cu un di e ventahanan grandi pa loke ta uso di gas natural ta cu e ta e combustible mas limpi cu tin pa genera electricidad”.

Esaki ta pone cu Aruba lo no mester depende mucho mas riba e fluctuacion di prijs di petroleo por ehempel, segun e representante di Eagle LNG.

            El a splica cu e prome parti di e proyecto ta e terminal di LNG cu ta bay wordo construi riba e tereno di RdA.

            Eynan lo ricibi e LNG, despues di cual mester instala un sistema di tubo for di e terminal te cu WEB.

Un pier nobo lo wordo construi pa ricibi e barco cu ta trece e gas natural pa Aruba.

            E gas ta wordo congela na -170 grado Celsius, pa asina e bira likido.

            E likido ta wordo transporta pa Aruba den barco y ta wordo deposita den un tanki.

            Ora cu e likido na dado  momento pasa door di e tubonan pa bay den direccion di WEB, e temperatura mes lo transforma e likido bek den gas cu lo yega WEB y yuda cu generacion di coriente na e planta.

            Asina Bastardo a sigui duna mas splicacion y na dado momento el a duna espacio na publico presente pa haci pregunta y el a contesta esakinan.

            Tabata tin diferente experto y ex experto cu a haci pregunta, mientras cu tabata tin tambe algun parlamentario di fraccion di MEP presente.