Reclamo na monton riba dos verkeersplateau traha den pura na Palm Beach

Chauffeurnan ta keda dal nan auto

ORANJESTAD (AAN): Como cu e trabao di construccion di rotonde na Palm Beach a cuminza, di antemano caba DOW a pensa cu e desvio di trafico pa pasa door di cayanan di Palm Beach y tambe e ruta door di Keito pa San Miguel, a dicidi pa temporalmente traha dos “plateau di trafico” na e cruzada net pabao di Sole Mare Restaurant na Palm Beach.

   Sinembargo automobilistanan a desaproba masalmente e diseño temp’i cauchi baulo.  Dos verkeersplateau a wordo traha riba caminda di Misa di Noord bay pabao rumbo pa Wendy’s Palm Beach.  Nan a wordo traha na como 30 meter di distancia for di otro.

   E largura di tur dos verkeer plateau no ta suficiente traha, y consecuencia di esey ta cu ora di ta pasando riba dje, bo auto ta “cay” y dal abao masha duro mes.

   Den apenas par di dia, un cantidad di rasca di e.o. Oilpan, Transmission Box, y Frame di auto a keda visible atras riba e dos plateau aki.  Esey ta indicacion cu enberdad e ta mucho chikito traha.

   E mester ta mas largo, pa asina bo auto subi full riba dje (cu tur cuatro wiel).  Pero esun cu a wordo traha eynan NO ta laga tur cuatro wiel subi pareu, y pesey full e parti abao di bo vehiculo ta cay, of raspa riba dje.

   DIARIO a compronde cu riba Social Media, hasta un yamada a start pa DOW bay kita e dos verkeersplateau aki.  Pasobra nan ta causando daño na vehiculonan, y ademas e caminda ey ta uno caminda hamas tin coremento duro.

   Den oranan di atardi, e caminda ta hopi pega mes, pues cu e dos plateau aki, el a empeora.

   Un ciudadano a puntra, pakico a pone esaki?  Pasobra casi no tin auto coriendo duro eynan mes.