ORANJESTAD (AAN): Si tur cos ta canando segun schedule, e vuelonan entre Aruba y Canada a inicia diadomingo ultimo cu e prome vuelo di Air Canada.
Segun itinerarionan di Aeropuerto Reina Beatrix, Air Canada cu ta bula for di Toronto Pearson International Airport (YYZ) a inicia dia 3 di October cu 1 vuelo pa siman, riba diadomingo. E vuelo aki a yega Aruba 1 pm y a sali bek pa Toronto 2:35 pm.
Sunwing(Toronto) lo inicia su vuelonan pa Aruba entrante 6 di October, aunke ta mustra cu e vuelonan lo ta riba dialuna.
E otro aerolinea cu lo ta bulando entre Aruba y Canada ta Westjet (Toronto). Nan lo cuminsa, segun schedule, dia 6 di November, dos biaha pa siman, riba diamars y diasabra.
Esaki sigur ta un bon noticia pa Aruba mirando cu e mercado canades a keda cera pa basta tempo. Awor, a pesar cu ta tiki vuelonan, ta mira cu pa December, e frecuencianan lo aumenta pa Air Canada cu 3 vuelo pa siman y den e caso di Westjet, esaki lo bira 2 biaha pa siman.
Lo tin mas di 55.000 asiento disponibel e winter aki.
