Un fenomeno cu cambionan di comunidad a haci necesario - *Un problema gigante cu a keda hopi tempo scondi, ta haya atencion - *Conclusionnan ta mustra cu mester actua na forma dirigi
ORANJESTAD (AAN) — Ta cu un suspiro di alivio nos a tuma nota di e informacionnan cu un investigacion den cuadro di Sociaal Crisis Plan a revela uno di e problemanan cu ya pa hopi tempo ta pidi atencion di gobernacion y di comunidad.
Ora ta papia di cuido di mucha, ta papia di e resultado di diferente desaroyo pero cu tin resultado directo serio pa e mucha cu mester haci centro di cuido su cas pa algun hora pa dia.
Pa comprende e funcion di centronan di cuido di mucha, mester bolbe e pasado prome cu damanan a cuminsa traha pafor di cas.
Ausencia di mama na cas a haci cu e mucha mester keda na un centro di cuido di mucha cu ta reemplasa e famia den cual su bida mester transcuri ora school caba y e mester bay cas.
Mas y mas muchanan no por bay cas despues di school ya cu ni mama ni tata ta na cas y na mester acudi na un centro, pa cual na inicio nos a pidi hopi atencion.
Kico ta loke ta wordo entrega na un mucha na un forma material y no masterial na un centro di cuido?
Na prome luga mester para keto y observa e hecho cu e mucha no ta den e seno conoci di su bida familiar y e mucha mester atende cu un hende cu no ta parti di su bida y den cierto casonan no ta comparti of por comprende cierto formanan di bida propio di un famia.
Na varios ocasion por a tende di muchanan cu no ta sinti nan mes completamente na cas den e Cas di Cuido, cu por ta diferente cu su sistema di bida.
Centro di mucha ta tene e mucha ocupa mientras mama, tata y otro famianan ta traha. Peronanan cu ta traha na e centro mester sa kico nan ta haci.
E trabou pa atende cu mucha despues di school na un centro, ta exigi profesionalismo y por bira sumamente importante den bida di un muchana forma positivo of negativo si leynan no ta indica con mester atende cu e mucha na e forma cu ta sirbi interes di e mucha.
Mescos cu tur trabou y ofishi, aki tambe e persona envolvi mester ta conocedor di un trabou basta dificil pa na forma efectivo e por atende cu e mucha cu pafor di cas mester crea su base di bida.
Ora e mucha yega cas cerca su mayornan atardi, ya casi no tin tempo pa e famia completo atende cu otro.
En corto, centronan di cuido di mucha tin un trabou importante y sigur mas importante cu e imagen cu a wordo crea di e empleo aki, cu mester sosten educativo ya cu e cuidador di mucha mester ta un profesional en todo caso un persona cu sa kico e mester haci y kico ta na interes di e mucha cu na e centro mester conoce e desaroyo cu e lo conoce na cas .
E personanan cu ta atende cu e muchanan mester ta profesional ya cu ta cu e material mas precioso pa futuro di Aruba, cu ta conocemento di e mucha riba tur tereno, mester atende.
Nos ta contento cu e atencion cu e materia aki ta haya ya cu di e logro di e proyecto aki e futuro positivo di e mucha lo depende.
