ORANJESTAD (AAN): Secretario Hulandes pa Asuntonan di Reino, esta Raymond Knops, a declara den fin di siman cu el a keda desapunta “te na cierto punto”, cu e no a haya un cupo den Gabinete Rutte IV cu a wordo huramenta e siman aki.
Raymond Knops di 50 aña di edad, tabatin hopi deseo di a keda riba e puesto, y den pasiyo durante e periodo di formamento el a wordo hasta menciona como un posible candidato pa bira e proximo Ministro di Defensa. Pero e cartera ey a wordo pasa finalmente pa Ministro Kajsa Ollongren.
“Mi lo a encanta pa sigui cu hopi energia,” el a declara na prensa prome cu e ultimo reunion di Conseho di Ministro demisionario riba Diabierna. “Pero esey ta loke ta pasa tin biaha den bida,” Knops a bisa, kende a añadi cu e no kier duna ‘demasiado importancia’ na e asunto aki.
“Ta sinti si un tiki sombrio,” el a bisa encuanto e hecho cu e tin di despedi den e ultimo reunion di Conseho di Ministronan, y despedi di e funcionarionan di Ministerio di Asuntonan Interior y Reino, cu cual el a traha hopi intenso desde cu el a wordo nombra na final di October 2017.
Unavez cu e Gobierno Hulandes a wordo huramenta Dialuna, Knops lo bay bek pa Tweede Kamer pa Partido CDA. “Tin demasiado trabao pa haci eynan,” Knops a bisa. El a wordo eligi pa Tweede Kamer den eleccion di Maart 2021 como Number #5 riba e lista di Partido CDA.
Secretario Hulandes nobo pa Asuntonan di Reino, a bira Alexandra van Huffelen di D’66.
