‘RAPP Digital Bootcamp 2025’ a yuda profesionalnan local desaroya nan destresanan digital

ORANJESTAD (AAN): E tres dianan di Digital Bootcamp, organisa pa Red Arubiano di Prensa Profesional (RAPP),

a finalisa exitosamente na JFK Education Center, un evento cu a uni periodista, comunicador y profesionalnan den PR pa stimula innovacion y creatividad den mundo digital.

Bao guia di Vladimir Fonseca Retana, un comunicador digital cu mas di 25 aña di experticio den ‘storytelling’ audiovisual, strategia di medionan social y periodismo digital, e participantenan a haya un experiencia practico y inspirador.

Durante e bootcamp, cu a tuma luga entre 21 y 25 di october, e siguiente topiconan a wordo trata:

• Structura di narativa pa crea y mantene e audiencia
• Uzo di Inteligencia Artificial den creacion di video y periodismo digital
• Hermentnan practico pa maneha informacion y desinformacion

E sesion final, cu a tuma luga diasabra 25 di october, a duna e participantenan oportunidad pa pone tur e conocemento nobo den practica, cu ehercicionan y guia di e facilitador.

E ‘bootcamp’ a yuda pa fortalece e capacidad di e profesionalnan pa conecta miho cu nan audiencia, uza AI como un aliado den ‘storytelling’ y crea contenido di calidad y confiabel.

E meta tabata pa duna e gremio di prensa y comunicacion e poder pa innova y adapta den un mundo digital cu ta cambia lihe. E ‘bootcamp’ a haya un bon acogida y RAPP ta contento cu e entusiasmo cu a wordo mustra pa cu e actividad.

RAPP ta planificando mas iniciativanan pa continua cu e desaroyo di destresanan den comunicacion digital y periodismo moderno na Aruba. Keda pendiente.