Pronto e lo gradua na Conservatorio “ArtEz Zwolle”

Justin Peña: un hoben talento cu desde hopi chikito a sinti pasion pa musica clasico

Seccion Hubentud den Movecion a entrevista e hoben Justin Peña, kende ta un studiante di Conservatorio “ArtEz Zwolle”, na Hulanda.

Justin ta ex-alumno di Colegio Arubano Havo y di Scol di Musica Rufo Wever.

Justin a conta nos cu el a cuminza sinti pasion pa musica, desde cu e tabata hopi chikito caba. “Despues cu mi a cuminza cu guitara clasico ora mi tabata tin 10 aña di edad. Mi a cuminza haya e pasion, mas specificamente pa e musica clasico di Aruba, na Scol di Musica Rufo Wever.

E prome cu mi a cuminza toca tabata e Wals ‘Vivian’ cu ta un composicion di Padu del Caribe. Despues di esey mi a cuminza bay un poco mas deep den otro cancionnan di Aruba, cu mi a yega na toca Rose Marie, cu ta otro wals di Buchi Boekhoudt, Pabien na tur Tata, y e clocknan di Pasco. Asina mi a cuminza studia teoria di music, pa mi por yega na drenta un Conservatorio na Hulanda”.

Na Scol di Musica Rufo Wever Justin a cuminza cu Cuarta y despues di tres aña el a cuminza cu guitara.

“Locual mi ta corda di Scol di Musica Rufo Wever, ta cu den tur concierto mi tabata toca alomenos un pieza, y cu casi tur dia mi tabata na e scol di musica. Tur mi docentenan a studia afo, y nan a prepara mi bon pa mi por haci mi toelatingsexamen, y ni mas cu e preparacion tabata hopi dificil y hopi trabao, door cu mi tabata gusta musica asina hopi, mi no tabata haye fastioso pero hopi dushi pa studia”, Justin a comparti cu nos.

Justin a drenta na Conservatorio na Hulanda na aña 2018. E estudio a cuminza cu su hoofdvak “guitara clasico”.

“Apart di esey na scol mi ta haya mas teoria di musica: un vak cu yama solfeo, historia di musica, historia di cultura, y Jaarlaagconcert, cu ta train bo con pa deal cu tur cos riba stage, entre otro e nervio, con pa pensa over di e cancion, y con pa presenta bo mes riba stage. Na banda di tur e vaknan aki mi ta studia composicion tambe. Prome cu mi a bay Hulanda mi tabata tin tres composicion caba, y na Hulanda mi a compone varios pieza y door cu awo mi ta haya les di composicion, mi ta componiendo hopi mas compara cu prome. Mi a cuminza cu composicion pa guitara clasico solista, y na Hulanda mi a cuminza experimenta mas, cu mas instrumento, dos guitara of string quartet, y awo mi ta componiendo e musica pa poesianan skirbi door di señora Ana Krozendijk (den feliz memoria). El a laga un buki atras cu yen di poesia, cu a inspira mi pa mi compone e musica”, Justin a menciona.

Justin tin su propio duo yama “Duo Era Nobo” cu awo ta den nan di tres aña tocando hunto.

“Den mi di dos aña di estudio na Hulanda mi a ser conoci cu Janneke Oosterwijk, unda nos a toca un pieza hunto. Nos a ripara cu nos ta traha bon cu otro, y nos a dicidi busca mas cancion pa toca hunto. Despues di esey, mi a bise di plan cu mi ta desea pa toca conciertonan na Aruba, y el a haye un idea hopi leuk, y nos a traha duro pa nos por a toca e concierto na December”, Justin a duna di conoce.

Na Hulanda e Duo a toca varios biaha na scol, y tambe den Biblioteca den Zwolle.

Justin ta den su di cuater aña di su estudio, y si tur cos ta corecto e lo caba na Juli di e aña aki.

“Pa mi futuro mi lo desea di duna les, anto na banda di duna les, mi kier sigui traha riba mi composicionnan, y tin e libertad di por experimenta con leu cu mi kier; sea na Hulanda of na Aruba, unda e oportunidad ta presenta”, Justin a subraya.

“Mi kier bisa na tur e hobennan na Aruba pa sigui nan pasion di locual nan gusta, pasobra esey ta e unico trabao cu bo lanta tur dia, mainta trempan, y bo lo no sintie manera un trabao, pero e ta un extension di bo spirito y nunca ta laat pa cuminza”, Justin a expresa.

Finalmente, Justin a expresa palabranan di gratitud.

“Mi kier gradici na prome lugar, na mi mayornan cu semper a para mi tras, na mi docentenan cu a kere den mi, cu a yuda mi yega na unda mi ta awe, na mi resto di famia cu semper a support mi, amigo y conocirnan cu a duna mi e oportunidad pa por experiencia y siña over di e mundo di musica”, Justin a conclui.