Diasabra dia 27 di september
ORANJESTAD (AAN): Ministerio di Finansa, Asunto Economico y Sector Primario, mr. Geoffrey Wever ta orguyoso pa anuncia cu lo duna su apoyo na e mercado mensual cu lo tuma luga na Lolita Plaza na San Nicolas.
E prome Pop-Up Market lo tuma lugar diasabra awo 27 di september di 9'or di mainta te 3'or di atardi riba Plaza Lolita na San Nicolas. E intencion ta pa e mercado tuma luga un bes pa luna, riba diasabra, y e iniciativa ya ta conta cu participacion di 16 vendornan entusiasma. Bishitantenan lo por encontra arte y artesania, producto local, dino jump pa e muchanan, cuminda y bebida. Den e siguiente lunanan e mercado lo wordo amplia cu productonan di agricultura manera fruta y berdura local.
Minister Geoffrey Wever ta enfatisa e importancia di e iniciativa aki,
"E mercado aki ta stimula economia local, ta ofrece un plataforma na empresarionan y productornan local, y ta sirbi como un paso importante pa e mercado nobo cu lo wordo realisa como parti di e revitalisacion di San Nicolas."
E apoyo pa e mercado ta completamente den linea cu e Programa di Gobernacion di Gabinete AVP-Futuro, cu ta pone prioridad pa stimula e sector primario y desaroyo economico na San Nicolas.
Ministerio di Finansa, Asunto Economico y Sector Primario ta invita tur residente y bishitante di Aruba pa yega na e mercado diasabra awor y contribui na e crecemento di nos economia local y na e fortalecemento di e comunidad di San Nicolas.
