ORANJESTAD (AAN): Diasabra ultimo a tuma luga na Cede di MEP na Santa Cruz un conferencia regional di e organisacion di partidonan politico COPPPAL,
cu a conta cu representacion di paisnan Republica Dominicana, Curacao, Boneiro, Belize, Argentina, Puerto Rico, Mexico y Aruba. E conferencia a wordo organisa y modera pa vice presidente di comision de decolonisacion di COPPPAL, sr. Joe Koolman.
Durante e conferencia a trata e tema importante di colonisacion y decolonisacion. Colonisacion no ta algo di pasado. E ta un tema actual. Unico diferencia ta cu e no ta sosode mas cu cañon y cadena, sino mas bien na forma di presion financiero, geopolitico y psicologico. Representantenan di e diferente paisnan a hiba palabra pa expresa nan preocupacionnan y nan solidaridad cu tur esnan cu ta luchando contra colonisacion. Entre nan lider di partido MEP Evelyn Wever-Croes, lider di partido MAN PIN na Curacao, Giselle Mc William y lider di e organisacion Nos Kier Boneiro Bel, James Finies y Joselyne Thielman.
Pa Partido MEP a participa Presidente Ricky Hoek, Secretario General Endy Croes, Secretario Internacional Gerrit Croes. E partido ta hopi orguyoso di por a habri su Cede, Cede Libertador Betico Croes, pa e conferencia importante aki.
