Prome Pieter van Vollenhovenprijs pa monumento na parti Caribense di Reino

ORANJESTAD (AAN): Riba diabierna 22 di april 2022, Gobernador di Aruba, Su Excelencia Alfonso Boekhoudt, tabata presente na Uncle Louis Store durante di un transmision live di e ceremonia di entrega di ‘Pieter van Vollenhovenprijs’.

E entrega fisico di e premio a tuma luga na Hulanda. Na nomber di Stichting Monumentenfonds Aruba (SMFA), señora Anne Witsenburg a ricibi e premio aki. SMFA a ricibi e premio pa restauracion y reutilizacion di e edificio Uncle Louis Store na San Nicolas.

                Ta prome biaha cu ta otorga e premio aki na un organisacion cu a restaura un monumento den e parti Caribense di Reino Hulandes. E monumento Uncle Louis Store tawata originalmente construi pa fungi como tienda y bibienda. Ora cu e fundacion a cumpra e edificio, ya el a cuminsa decai. Sin e iniciativa aki, e edificio lo a sigui deteriora cu posiblemente lo mester a bash’e abao como consecuencia. Despues cu SMFA a restaura y reutiliza e edificio, el a bira e oficina mas sostenibel di Aruba.

                Tres otro iniciador di reutilizacion di e monumentonan na Hulanda tambe a ricibi e Pieter van Vollenhovenprijs awe. Ta trata di De Volmolen na Amersfoort, Fifth | NRE na Eindhoven y Fort van Hoofddorp.

                Na 2013 prof. mr. Pieter van Vollenhoven a ricibi e premio aki na su despedida di su presidencia di 27 aña na Nationaal Restauratiefonds. Den su añanan como presidente, señor Van Vollenhoven a para firme pa iniciadornan cu ta haci hopi esfuerso pa por conserva un edificio monumental.

                Pa mantene e filosofia aki, a establece e Pieter van Vollenhovenprijs pa anima iniciadornan cu kier duna edificionan monumental un bida nobo.

Potret: © Kabinet Gouverneur Aruba