Prome mitar di 2022 ya caba Aeropuerto a recupera 89% di total di pasahero

Compara cu 2019.... ORANJESTAD (AAN): Aruba Airport Authority N.V. (AAA) ta raporta riba Aeropuerto Internacional Reina Beatrix (AUA Airport)

su prestacion pa cu e prome mitar di aña 2022!  E cantidad di pasaheronan a aumenta considerablemente den e di dos cuartal mustrando cifranan di recuperacion excelente compara cu e mesun periodo na 2019. E cantidad total di pasaheronan cu ta biaha for di Aruba cu ta genera entrada durante e prome mitar di 2022 tabata 577,143 cu ta representa un recuperacion total di 89% compara cu 2019.

   Prome cuartal di 2022: Un recuperacion total di 101% a worde raporta pa e di dos cuartal di 2022 compara cu mesun period na 2019. Den luna di April 2022 un total di 110,983 pasahero a biaha for di AUA Airport. Esaki tabata 6% mas cu luna di Maart 2022. Den Mei 2022 101,570 pasahero a biaha, loke ta 8% menos cu e luna anterior.

   Den Juni e cantidad a subi considerablemente te na 105,788 cu ta 4% mas cu Mei 2022. Durante e di dos cuartal di 2022 un total di 245,889 pasahero a biaha pa Merca, 4,896 pa Canada, 23,679 pa Europa, 13,025 pa Antiyas Hulandes y 30,831 pa Latino America.

   Un promedio di Passenger Load Factor (PLF) na salida (cantidad di asiento ocupa di e cantidad total di asiento disponibel abordo di un avion ora di sali for di Aruba) pa e mercado mericano di 90%, 89% y 90% a worde raporta pa April, Mei y Juni respectivamente.

   E promedio di PLF pa tur mercado tabata 86%, 86% y 89% respectivamente durante e mesun periodo. Den e di dos cuartal di 2022 nos a sobrepasa e promedio annual di PLF na salida pa tur mercado di 2019, cu ta 85%.

Durante e ultimo 3 lunanan AUA Airport tabatin un promedio di 32 buelo pa dia, compara cu un averahe di 35 buelo pa dia den mesun periodo di 2019, pues solamente un promedio di 3 vuelo pa dia menos.

   Na April, Mei y Juni AUA Airport a recupera 101%, 104% y 99% respectivamente di e total di pasahero saliente compara cu e mesun lunanan den 2019.E recuperacion total pa cu e di dos  cuartal di 2022 a subi te na 101% compara cu 2019, cual ta un aumento di 24 punto procentual  compara cu e recuperacion cu disfruta pa e mesun period na 2021.