ORANJESTAD (AAN): Recientemente tabatin reunion publico den Parlamento encuanto Reglamento di Orden nobo pa Conseho di Ministro.
Prome Ministro Evelyn Wever-Croes tabata den Staten splica tocante e Reglamento nobo di Orden, cu mester a worde adapta durante inicio di Covid.
Segun Wever-Croes, por a tuma nota cu e nivel di Parlamento a bin ta cambiando desde 2017 y esaki di un parti ta debi na e Presidentenan di Parlamento. Por a nota e nivel drechi tambe di Parlamentarionan di coalicion cu a compromente nan mes na un cambio real den Parlamento. Prome Minister den su disertacion diahuebs den Parlamento, a expresa e orguyo cu e ta sinti pa cu e respet cu tur cu ta sostene su gabinete tin den Parlamento, e organo mas halto di nos constitucion.
E mandatario principal di nos pais a haci un contraste di e manera con Parlamento tabata ta tempo e tabata den oposicion y awo bisando: “Ami a sinta 8 aña den oposicion. Reunionnan den Parlamento tabata na un nivel di riool, un nivel baho di e sostenedornan di e gabinete di e tempo ey. Presidentenan cu a sinta den e stoelnan ey 8 aña a conduci e luga aki manera ta lodo so tabata tin akiden. No tabata tin debate riba temanan real. Tabata insulta mama, tata, yiu y te hasta Spirito Santo. Un parlamentario di AVP a bin den reunion cu nanishi yen di puiro, anto ta grita “bin wak mi cos”. Otro ex minister ta zwaai cu maandverband”.
Prome Minister a expresa cu esey tabata e nivel di Parlamento 8 aña largo cu el a representa pueblo den oposicion den Parlamento. Pero Gabinete Wever-Croes a compromete su mes cu e nivel ey no kier wak nunca mas den Parlamento.
Gabinete Wever-Croes I y tur e parlamentarionan cu a sostene e gabinete a hisa e nivel den reunionnan publico di Parlamento y nos comunidad a cuminsa haya placer den sigui e reunionan atrobe. “Nos tabata papia di temanan, nos no mester a yega gaña aki den. E tempo ey Ady Thijsen tabata Presidente di Parlamento y aworaki Edgard Vrolijk ta haciendo un bon trabao pa continua esaki tambe”.
Prome Minister a enfatisa cu si kier pa pueblo respeta Parlamento, Cada parlamentario mester contribui pa mantene un nivel halto den Parlamento. Bin den reunionnan publico y haci comedia no ta contribui na nada positivo pero si ta contribui cu hendenan eyfo ta bolbe perde respet pa Parlamento. “Parlamento ta e organo mas halto di nos constitucion, laga nos dun’e respet. Mester respet pa asina gana respet di pueblo tambe”, Prome Minister a enfatisa
