Conferencia di prensa na su yegada na Aruba
ORANJESTAD (AAN): Na su yegada na Aeropuerto Reina Beatrix, diahuebs 13 di april atardi, Prome Minister Minister Evelyn Wever-Croes a ricibi miembronan di prensa pa duna un resumen di su siman di biahe di trabao na Hulanda. Manera semper ora cu e mester bay Hulanda pa atende cu asuntonan di Aruba y Reino, Prome Minister ta percura pa un agenda intenso di reunionnan asina probecha lo maximo di su estadia na Hulanda. Y asina Prome Minister tabata tin mas o menos 30 reunion den e biahe aki.
Prome Minister desde dialuna 3 di april cu el a yega Hulanda, a cuminsa cu reunionnan hopi importante riba diferente tema di interes comun cu Hulanda y di interes pa e recuperacion di Aruba. Tabata un siman di trabao hopi importante pa loke ta trata relacion di Reino.
Manera ya conoci, diamars 4 di april tabata un dia importante na unda cu a firma e acuerdo “Onderlinge Regeling” entre Premiernan di paisnan den Reino y Secretario di Estado di Hulanda. Despues di esaki durante e conferecia di prensa na Hulanda, Prome Minister Evelyn Wever - Croes a tene un discurso den cual el a expresa cu e logro aki ta demostra cu e ta posibel pa den tempo dificil hiba combersacion cu otro como pais y pa yega na otro. Ademas e ta demostra cu ora duna otro espacio, respet, y scucha for di otro, cu esaki ta conduci na exito.
Prome Minister prome cu el a sali di Hulanda pa Aruba, a expresa cu e tin un sentimento di hopi satisfaccion y orguyo di loke a logra y ta sigui logra enfatisando cu Aruba ta un pais bendiciona. “Cu e acuerdonan logra na Hulanda, e peor dianan di crisis cu nos pais a biba, ta tras di lomba y miho dianan di recuperacion y speranza ta nos dilanti. E acuerdo aki ta bay sirbi como base, pa den bon cooperacion den Reino nos sigui traha pa recupera nos economia pa logra un progreso cu stabilidad y prosperidad pa Aruba”, Prome Minister Evelyn Wever-Croes a expresa na su yegada for di Hulanda.
Na aeropuerto Prome Minister a worde ricibi cu un bunita boket di flor pa Minister di Enseñansa y Deporte Endy Croes kende a para tambe hunto cu Prome Minister durante e conferencia di prensa pa mustra sosten di Conseho di Ministronan na e logro y trabaonan di e siman tras di lomba. Prome Minister na ciere di e conferencia a enfatisa cu Gabinete Wever-Croes ta un gobierno stabiel cu ta traha pa recuperacion y e bienestar di Aruba.
