AVP mester nombra representante nobo den Parlamento
*Cas di Benny ta e proximo caso den e bomnan politico cu ta rementa??
*Rycond Santos Do Nascimento lo ta combersa cu Miguel Jose Mansur
ORANJESTAD(AAN)—Despues di e veredicto di Huez ayera, manera DIARIO a pronostica, bomnan a cuminsa rementa den mundo politico di Aruba y sigur den AVP.
Te na ultimo momento pa bay imprenta DIARIO tabata na careda cu informacionnan cu tabata drenta y cu tabata duna indicacion di e resultadonan pisa cu e decision di Huez tabata tin den mundo politico na Aruba.
Reaccionnan pisa a bini for di seno di AVP mes na prome lugar despues cu a bira conoci, cu e contenido di sentencia di Huez na direccion di Benny Sevinger tabata wordo presenta na un forma diferente for di e realidad cu e tabata encera.
Huez den Prome Instancia a condena Benny Sevinger na castigo di prison pa soborno y malversacion di fondonan di su fundacion durante e tempo cu e tabata Ministro den e Gabinete di Mike Eman.
AVP mester reemplasa su representante di Parlamento di Aruba despues di e condena di Huez cu como castigo no solamente a dicta cu Benny Sevinger mester bay prison pero cu e no por participa den eleccion durante cinco ana, tempo durante cual e no por ocupa ningun funcion publico, manera esun di Miembro di Parlamento cu e mester bandona.
Di e forma aki Huez a pone un fin na e estadia di Benny Sevinger den Parlamento, cu tabata resultado di exigencia di AVP cu a exigi pa Benny Sevinger participa na ultimo eleccionnan y como caso unico den Reino bira representante di Pueblo den Parlamento di Aruba despues cu el a wordo eligi como tal estando den prison.
E resultado di e Caso den Corte di Husticia a laga un sabor sumamente amargo atras no pa motibo di Huez pero pa e hecho cu Partido AVP a celebra un supuesto triunfo di Benny Sevinger den Corte enfrente e baluartenan di partido AVP, cu a haya castigo mas pisa.
Informantenan a indica na DIARIO cu e veredicto di Huez den e caso di Benny Sevinger no tabata contene ningun triumfo pero a papia cla di e hecho cu el a comete un caso castigabel na cual el a ricibi un castigo di prison, mescos cu e otro personanan cu a wordo acusa.
Informacionnan concreto ta indica cu durante e tratamento den Corte mas asunto a bini dilanti y cu Ministerio Publico a indica cu nan lo cuminsa un caso tambe pa pidi un suma di placa di alrededor di Un Miyon pa loke nan ta considera placa cu Benny Sevinger lo mester a ricibi den e caso aki y pa cual su cas lo por wordo bendi si e caso aki sigui como caso separa.
Mientrastanto informantenan ta indica cu partido AVP ta den un problema serio ya cu no ta unicamente cantidad di hende ta bandona seno di e partido pero informacionnan ta indica cu Rycond Santos do Nascimento lo ta den combersacion cu Miguel Mansur di Accion 21.
Segun informacionnan digno di credito esaki por encera cu proximamente por tin mas kiebra den AVP, aunke do Nascimento mes ta insisti cu e ta keda den fila di AVP.
DIARIO ta den contacto cu informantenan clave cu ta indica cu por spera basta sorpresa politico na Aruba sigur den seno di AVP, cu atrobe a conoce condena di un politico den funcion di Ministro.
